焗番薯伴乳酪西班牙腸

2012年5月30日

今個月出既post破晒記錄，從未試過一個月出咁多post。尋日睇飯食男女教整“焗番薯伴忌廉辣肉腸”，咁啱上星期六買咗番薯，除咗整包外都仲未諗到點消滅佢，一於跟食譜整，屋企有西班牙腸，有easiyo既士多啤梨yogurt，忌廉太肥改用yogurt會更健康，酸酸辣辣的餡料加上番薯皮味道唔錯哦，雖然賣相跟原裝的不能比，但今次的第二次創作好成功呀。

材料：
2條  番薯，一開四，將肉刮出，番薯肉切絲
適量  yogurt
適量  basil
適量  西班牙腸，切幼粒

做法：
1. 用air fryer將番薯皮用180℃焗7分鐘，切絲的番薯肉用150℃焗4分鐘。
2. 西班牙腸，basil，yogurt拌勻。
3. 放2在焗好的番薯皮上，再將切絲的番薯肉放面即成。


注：用air fryer焗番薯絲只做到脆身，但做不到油炸的金黃色效果。

2012年5月27日 是日煮意

2012年5月27日

昨天由朝忙到晚，今日輕鬆好多，晚餐繼續用air fryer，今晚食三文魚柳，只簡單的用salt & pepper醃三文魚半小時，放入air fryer用120度炸10分鐘，再用200度炸7分鐘至表面金黃色。加上蘑菇白汁和昨天整的什菜。今晚冇湯不過有mango juice。

帶飯的飯盒係廈門炒米，材料有青椒、蛋絲、蝦仁、叉燒、甘筍絲、米粉，所有材料已經係昨日預備好，今日快快手手炒埋一碟就攪掂。

叉燒係昨日用air fryer整，不過昨日整太多嘢，忘記影相作記錄，有air fryer唔需要再係街外買叉燒，整叉燒的食譜一直跟Rachel Yu的燒排骨食譜，so far so good。同埋醃叉燒唔需要醃過夜，試過醃過夜發覺肉質會比較死實，寧願味淡小小都要保留肉質既juicy。

買多隻薯仔試整air fryer用家推薦的麥噹噹薯條，薯仔切條用水浸30分鐘以上，後隔水將薯條晾乾，我晾了一晚，今日試整，果然係麥噹噹feel加埋蒜鹽更似。

AF - 燒野生大虎蝦

2012年5月26日

好大隻蝦，印度野生大虎蝦一盒7隻都係HK$312，好抵買，最吸引係“野生”2隻字，之前睇報導說養蝦場用好多激素令蝦快速長大，因此對食蝦一直有戒心，有野生買的當然可以比較放心食用。

 用air fryer燒野生虎蝦，超健康又方便，基本上今餐除了湯外全部都係用air fryer攪掂，青椒、翠玉瓜、甘筍、薯仔全部切件，加煙肉200度氣炸15分鐘。因為份量多中途拎出來搖2次，make sure受熱平均。虎蝦用200度氣炸9分鐘，出來剛好，蝦肉結實彈牙，好好味。

貫徹慳家本色，用蝦頭加蜆肉薯仔煮湯，煮好後用blender打成濃湯，好鮮味。最重要係用新敗的Felicita，畫龍點晴。

杏仁薄片

2012年5月26日

每次整雪糕都會有蛋白剩下，所以整雪糕唔單止係雪糕，仲要諗埋點處置啲蛋白。

呢個好易整，只不過要花點時間，因為一盤只有6-7片，要做好幾盤，由開始到完成起碼要用上半天。

食譜跟呢個http://blog.udn.com/louisecafe/2509737，不過我減糖至50g。

【包餅工房】P仔 - 吞拿魚包&芝士火腿包

2012年5月26日

今日係非常勤力的一天，早上去一田血拼，下午整雪糕、麵包、杏仁薄片，傍晚預備晚餐及飯盒的材料。

今日2款口味，吞拿魚&芝士火腿。

材料：
50g  老麵種
280g 昭和日本口高粉
25g   原糖
40g   日清菜油
5g     岩鹽
60ml  奶
80ml  水
2.8g   金馬利酵母

吞拿魚包每個麵糰重60g，剩下麵糰220+g整芝士火腿包。Remarks：吞拿魚鬆可以再加多點沙律醬或水，今次吞拿魚鬆太乾身。

日式叉燒豬軟骨湯麵

2012年5月26日

係一田血拼後，順便係商場醫肚，首選當然係日本麵，呢間係Pokka集團旗下的日本麵店，味道好一般，豚王好味好多，2塊日式叉燒加一塊豬軟骨的豬骨湯麵要HK$86，塊叉燒又唔夠滑，隻溫泉蛋OK，搵日又要係屋企自製日式叉燒。

我係屋企整的湯麵一啲都唔會比外面的遜色，下面係我至愛既帆立貝廣島蠔豬骨湯麵，yummy！

出城去一田

2012年5日月26日

每次坐車經過譽港灣一田，都諗搵次一定要去逛下。呢輪各大日式超市大減價，依家唔去更待何時？

其實去一田超方便，坐巴士10分鐘就到，最正係回程，有專線小巴門口至門口，very nice。

雪櫃爆滿，冰箱又要留位俾雪糕機，要忍下手，貴精不貴多，抵既先下手。

 今日tea time係台灣巨峰，HK$39.9好抵食！

 今日整士多啤梨雪糕，太大兜，“畢”番啲出來整奶昔，yummy！

【敗物誌】Felicita & Easiyo

2012年5月25日

Sogo感謝日所有Narumi有15%discount，加埋Sogo卡的discount，價錢跟係日本買的相差不遠，係度買有好處，唔洗山長水遠托餐死，又唔怕中途打爛，先買幾件實用既。

再去ccsuper入乳酪粉，呢啲又係俾bk啲jm毒既，佢地爭取到唔需要買乳酪機都可以買八包粉送一包，平常係十送一的，咁當然唔好執輸。

King2hearts

2012年5月24日

呢套劇在韓國的收視係同時段三套韓劇中最差的一套，但我覺得係最好睇的一套，韓國大媽的口味真的不能作準。

去過幾次韓國對南北韓的情況算是有些了解，女主在WOC跟美國隊談判時的說話我想道盡不小韓國人的心聲，韓戰尚未結束，南北韓只是處於休戰狀態，美國中國間接的通過南北韓互相角力，韓國人想和平但控制權不在他們手上，呢套劇正通過虛擬的皇室及南北聯婚去表達希冀和平及竭力阻止戰爭的主題。

一部偶像劇卻是這樣的命題，收視就注定係sad ending。

意大利脆餅

2012年5月20日

整雪糕剩下好多蛋白，用來整我媽咪最鍾意食既意大利脆餅就最啱，呢個餅冇蛋黃冇牛油，老人家好啱食。

材料A:

4個蛋白

100g糖(原食譜130g糖)

小許鹽

材料B:

120g低粉

30g粘米粉

材料C:

50g開心果

100g合桃

100g杏仁

50g cranberry乾 

做法：
1.將A攪拌至硬，然後加入B拌勻。
2.加入C混合拌勻即可。
3.倒入長條形蛋糕盤，用175℃烤40分鐘。
4.待凍，然後放入雪櫃雪至硬。
5.將它切成薄片，大約2毫米厚。
6.再將薄片放入烤爐，用150℃烤15分鐘或至鬆脆即可。

我試過唔攤凍入雪櫃，趁熱入焗爐烘脆都ok.

【包餅工房】P仔 - 老麵種芝士包

2012年5月19日

今日6點就起床整雪糕和麵包，然後返工，中午放工就可以收第一輪雪糕跟包包，再攪定第二輪雪糕，下午鐘點工開始清潔時塵土飛揚，要全面停工。

今日呢個芝士包係送俾屋企人的，滿滿咸香的芝士包包，亦是我最喜愛的咸包之一。不過今日包包不是太高大只有13.5cm高。

材料：
50g  老麵種
250g 日本昭和高筋粉
15g   日清菜油
5g     喜瑪拉雅岩鹽
60g   奶
100g 水
3g     金馬利酵母
17g   糖
滿乾果格的安佳高溶點芝士

先用mode26攪拌15分鐘，再用mode2 軟吐司mode，上午8:15開機，預約14:00收包。點選淡色及粗混模式。

P仔雪糕機 - Vanilla雪糕

2012年5月19日

試過跟機食譜唔滿意，試過不用蛋奶糊又唔成功，尋尋覓覓，最終原來只有用蛋奶糊才可以整到軟滑的雪糕口感。

用iherb買的organic雲呢嗱條，跟"我愛冰淇淋"的食譜的3倍份量。

材料：
6個  蛋黃
180g 糖 (原食譜270g，不過整Vanilla雪糕60g糖都係太多，可以再減30g)
480ml 牛奶
600ml 淡忌廉
1.5支 雲呢嗱條

蛋奶糊整好後，一半放入P仔雪糕機再放入冰箱繼續操作，餘下一半的蛋奶糊就放入雪櫃普通格，第一輪雪糕約需3小時，第一輪完成就可以再用P仔下料整第二輪，每次P仔可整約720ml雪糕，今次一盒俾屋企人，一盒自己食。

大愛P仔，自家製的雪糕，奶味特濃，什麼哈根大師都要靠邊站，味道直迫我的至愛Mövenpick。

【包餅工房】P仔 - 老麵種麥包

2012年5月17日

Home made bread跟店舖賣的包包最大既分別係沒有添加劑，店舖落添加劑主要令包包延長保存時間及柔軟度。

如果冇添加劑，只用直接法整包，包包可能過一天就會變得乾硬。

為了要令無添加的Home made bread保持柔軟，就出現了中種、老麵種、液種、低溫發酵、湯種等等方法．．．加上搭配不同形式的酵母（instant yeast, dry yeast, fresh yeast, 天然酵母等等．．．）一個包包看似簡單，其實係博大精深。

叫做已掌握了最簡單的instant yeast＋直接法。今日就進一小步用老麵種整包包。

材料：
50g    老麵種 (撕成小塊加入)
130g   Marriage's 高筋粉
120g   Marriage's  麥粉
5g       岩鹽
17g     日清菜油
2.8g    金馬利酵母
17g     Raw sugar
60ml   凍奶
100ml 冰水

先用mode26烏冬mode打15分鐘，再用mode13麵團mode。一小時後將麵糰取出排氣，再切開2份滾圓後靜置15分鐘。用手將麵糰拍扁排走大氣孔，再用擀麵棒將麵糰擀成長條狀，將麵糰捲起放入麵包箱作最後發酵。麵包箱塗油灑粉方便脫模。麵糰發至8成滿放入預熱200℃焗爐焗30分鐘。

 成品出來了，用了300g粉仍未能頂蓋！

 包包重量為447g，好似偏輕，唔知係咪因為用了麥粉？

切片麥包做早餐，yummy yummy。

【包餅工房】老麵種

2012年5月16 日

一直都係用直接法整包包，bk啲jm們熱烈討論及嘗試的中種、液種、湯種、低溫發酵等因為懶沒有嘗試，做人不能原地踏步，做包也一樣必需更進一步。今日先嘗試比較簡單的老麵，跟胡涓涓的做法。

材料：
125g  加拿大高筋粉
80g    水
1.5g   金馬利酵母
1g      岩鹽

用pizza麵糰mode13，搓至成糰從麵包機拎出，再用手搓至成圓形，放入已塗了小小橄欖油的膠箱，麵糰上噴水，放入雪櫃普通格雪藏至少一天。

20幾個小時後，老麵種已發至超過2倍大，重量約154g，分成約50g一份，未用既就放入冰箱，用前解凍，撕成小塊再放入主麵糰就okay。

AF - 豬頸肉

2012年5月15日

繼續玩新玩具，今日整豬頸肉，用紹酒、糖、老抽、魚露醃豬頸肉，200℃+15分鐘，剛好，邊邊有小小焦。又係出咗好多油，以後整肉都會用佢，真係食小好多油。

 未開始炸，一塊手掌大小小既size剛好

 個邊焦焦地捲起，火候剛好

今晚係日式豬頸肉烏冬

【包餅工房】P x P - 香草蒜蓉包

2012年5月14日

用星期日的法包塗上自製的香草蒜蓉醬，再用air fryer烤3分鐘，就有又香又脆既香草蒜蓉包。

香草蒜蓉醬：新鮮蒜頭用hand-held blender打成蓉加上香草&牛油攪勻再加小小鹽調味，super easy。

今次 P仔 cross over Air Fryer 大成功。

【包餅工房】生種酵母mode整乳酪?

2012年5月13日

跟bk啲jm研究可唔可以用P仔取代yogurt maker整yogurt，因為P仔有一個24小時生種發酵的function。我已經有yogurt maker就自告奮勇的替大伙做實驗。實驗由下午約4時開始，需時8小時。

名為：P仔 VS yogurt maker整yogurt的pk賽

材料跟平常用yogurt maker整home made yogurt一樣：鮮奶800ml及一杯原味yogurt

先將所有盛載yogurt的器皿消毒，用牛奶布甸杯放入P仔，因為jm們冇我的yogurt杯

上層加yogurt杯

yogurt maker放三杯，同時間開始pk賽

上面呢杯係用yogurt maker整出來的，明顯已經凝固

P仔內的全部仍然係液體狀，即係失敗，P仔的生種發酵mode的溫度跟整yogurt需要的40℃有距離，因此並不能用來制作yogurt。

【敗物誌】Philips Airfryer HD9220

2012年5月13日

bk真係好毒，烹飪錦囊內heat爆既東西都係好吸引，早排有朋友介紹都冇失手，點知係bk睇咗條thread一排就中毒，之前一直頂得住，因為我已經有焗爐，而且呢嚿野好大嚿，不過睇完bk啲jm用佢整嘢食後，忍唔打住打電話去order。官網售價HK$1,998，豐X賣HK$1,798，格價網有電器舖最低賣HK$1,510，我搵咗間有現貨及可送貨的賣HK$1,600。

呢部跟焗爐相似，賣點係唔用油都可以做到油炸脆卜卜既效果，不單止不用油而且更可以將食物既油份迫約80%出來。正啱我呢種鐘意食香口嘢，但唔會開油鑊又怕食油既人。另一賣點就係預熱快，唔好似焗爐咁要慢慢預熱，又啱我呢種心急既人。

今日全日在家玩玩具，今朝一早去超市買食材，今日試整：麥樂雞、薯餅、三文魚頭、翠玉瓜＆雞翼。

午餐先來簡簡單單既雞塊＆薯餅，200℃+10分鐘，出來得2滴油。

同場加映沙律，食番啲蔬菜平衡番啲熱氣

再來跟bk啲jm整三文魚頭，用日本清酒加岩鹽醃魚頭1小時，先燒底部180℃+12分鐘，用錫紙墊住魚眼個面，不過忘記塗小小油，反轉撕開錫紙時魚皮黏住錫紙。

燒完底再燒面又係180℃+12分鐘，靚靚既日式鹽燒魚頭就攪掂。

今晚晚餐係日式鹽燒魚頭定食，魚頭外有沙律、面鼓湯＆日本米飯。

飯後甜品係自制乳酪雪糕。

飯後整明天的飯盒，有翠玉瓜及水牛雞翼。翠玉瓜切件再掃上小小橄欖油180℃+8分鐘。水牛雞翼用paprika加茄膏醃了一個下午，之後先醒起忘記放鹽，啲paprika又唔夠辣又冇咸味，味道一般唔收貨，不過就真係皮脆肉嫩有肉汁，yummy yummy。

再看看出來的油，真係好恐怖，只係煮了個魚頭、翠玉瓜跟雞翼，就有咁多油，諗起以前將呢啲油食晒落肚就覺得好恐怖。整體來說對呢件新玩具好滿意，不過發現一大缺點就係如果連續整幾味，後煮的會產生好大油煙，一定要開大抽油煙機再將廚房門關上才可以。

 有埋呢件玩具，我個廚房越來越完善，雖然更見狹小。不過食既質素可以更進一步，起碼今日就整了從來冇諗過會係屋企整既鹽燒魚頭。下個好想用呢部機整既係西多士，有jm已經試過可以用來整到不用油炸但效果一樣既西多士，用上home made麵包整西多士諗起都開心。