【包餅工房】麥包&腸仔包

2012年7月29日

材料：
200g  金像盒裝高粉
50g    Marriage's 麥粉
10g    韓粉(後加)
172g  水
6g      non-fat奶粉
5g      岩鹽
10g    葡萄籽油
17g    原糖
2.8g   金馬利酵母
38g    老麵種

上面的份量是一斤包，用mode 15半斤包的模式，80分鐘後，出來的麵糰重512g，分割180g出來整造型包，餘下的放入半斤包的烤盤，用P仔繼續完成半斤包的焗製。

分割出來的180g，可以整3個造型包，今日目標係消滅冰箱庫存的腸仔。今日冇用焗爐改為試用air fryer，3個包剛好一機，焗出來跟用焗爐差不多，因為預熱快，以後焗少量麵包會用AF。

今次用稀釋的麥芽糖掃包面，出來個樣唔係好得，下次都係用番蜜糖或蛋汁。

AF - BBQ Pork

2012年7月2日

用Air Fryer整叉燒真係超方便，整靚叉燒中途要上幾次蜜糖水在叉燒上，AF只要拉個烤盤出來就可以，對比焗爐要拎個烤盤出來上蜜糖，AF真係超方便同安全。


今日整叉燒&豬頸肉，2塊既size差不多，一樣係舖滿整個烤盤，出來肉一樣都有收縮，不過油份就不一樣，AF迫油既功能超強勁，下面係豬頸肉迫出既油份，好誇張耶，足有4湯匙油，估不到相對豬頸肉叉燒油份少好多，可能左邊的一塊比較瘦，只有右邊一塊係半肥瘦。


下次食豬頸肉都係要揀grill的，grill可以食少啲油，如果係蒸或炒，肯定不知會食多幾多匙油落肚。

AF - 燒春雞

2012年6月10日

呢個燒春燒既idea係由一位blogger而來，佢既用料簡直係以本傷人，屋企冇咁豪華既用料，所以只係用佢既idea而配上cheap cheap用料。佢既idea是在雞皮下釀入名貴的菇及pesto醬，風乾數小時後，雞外塗上黑松露油然後放入焗爐烤熟。我的版本做法一樣不過用料不同。

先將雞洗淨抹乾，再用岩鹽捽勻整只雞。

我整過幾次春雞，第一次知道原來雞皮下可輕易釀入材料，由雞頸位插入手指，釀入的材料差不多可以推勻整只雞由頸至脾的部份，上面我用切碎的黑松露、白牛肝菌、乾蔥釀入雞皮下，上圖見到黑黑的就係雞皮下的黑松露。黑松露、白牛肝菌都係雲南貨，當然不可以跟鬼子佬貨相比，叫做一試無防。

再捽一些herb在雞皮上，然後風乾3小時，放入air fryer前噴上橄欖油，用160℃燒8分鐘，反轉再燒8分鐘，再反番轉用200℃燒8分鐘。

 今次第一次用air fryer燒春雞，燒得比較乾，不過好香菌味，同雞肉尚算嫩滑。

麵包丁係食剩的方包，切丁加小許橄欖油，用air fryer160℃燒5分鐘，加上羅馬生菜及洒芝上粉，yummy。


有了air fryer，煮食方便了許多，最好既地方係唔需要預熱，加熱超快，又快又正。

2012年5月27日 是日煮意

2012年5月27日

昨天由朝忙到晚，今日輕鬆好多，晚餐繼續用air fryer，今晚食三文魚柳，只簡單的用salt & pepper醃三文魚半小時，放入air fryer用120度炸10分鐘，再用200度炸7分鐘至表面金黃色。加上蘑菇白汁和昨天整的什菜。今晚冇湯不過有mango juice。

帶飯的飯盒係廈門炒米，材料有青椒、蛋絲、蝦仁、叉燒、甘筍絲、米粉，所有材料已經係昨日預備好，今日快快手手炒埋一碟就攪掂。

叉燒係昨日用air fryer整，不過昨日整太多嘢，忘記影相作記錄，有air fryer唔需要再係街外買叉燒，整叉燒的食譜一直跟Rachel Yu的燒排骨食譜，so far so good。同埋醃叉燒唔需要醃過夜，試過醃過夜發覺肉質會比較死實，寧願味淡小小都要保留肉質既juicy。

買多隻薯仔試整air fryer用家推薦的麥噹噹薯條，薯仔切條用水浸30分鐘以上，後隔水將薯條晾乾，我晾了一晚，今日試整，果然係麥噹噹feel加埋蒜鹽更似。

AF - 燒野生大虎蝦

2012年5月26日

好大隻蝦，印度野生大虎蝦一盒7隻都係HK$312，好抵買，最吸引係“野生”2隻字，之前睇報導說養蝦場用好多激素令蝦快速長大，因此對食蝦一直有戒心，有野生買的當然可以比較放心食用。

 用air fryer燒野生虎蝦，超健康又方便，基本上今餐除了湯外全部都係用air fryer攪掂，青椒、翠玉瓜、甘筍、薯仔全部切件，加煙肉200度氣炸15分鐘。因為份量多中途拎出來搖2次，make sure受熱平均。虎蝦用200度氣炸9分鐘，出來剛好，蝦肉結實彈牙，好好味。

貫徹慳家本色，用蝦頭加蜆肉薯仔煮湯，煮好後用blender打成濃湯，好鮮味。最重要係用新敗的Felicita，畫龍點晴。

AF - 豬頸肉

2012年5月15日

繼續玩新玩具，今日整豬頸肉，用紹酒、糖、老抽、魚露醃豬頸肉，200℃+15分鐘，剛好，邊邊有小小焦。又係出咗好多油，以後整肉都會用佢，真係食小好多油。

 未開始炸，一塊手掌大小小既size剛好

 個邊焦焦地捲起，火候剛好

今晚係日式豬頸肉烏冬

【包餅工房】P x P - 香草蒜蓉包

2012年5月14日

用星期日的法包塗上自製的香草蒜蓉醬，再用air fryer烤3分鐘，就有又香又脆既香草蒜蓉包。

香草蒜蓉醬：新鮮蒜頭用hand-held blender打成蓉加上香草&牛油攪勻再加小小鹽調味，super easy。

今次 P仔 cross over Air Fryer 大成功。

【敗物誌】Philips Airfryer HD9220

2012年5月13日

bk真係好毒，烹飪錦囊內heat爆既東西都係好吸引，早排有朋友介紹都冇失手，點知係bk睇咗條thread一排就中毒，之前一直頂得住，因為我已經有焗爐，而且呢嚿野好大嚿，不過睇完bk啲jm用佢整嘢食後，忍唔打住打電話去order。官網售價HK$1,998，豐X賣HK$1,798，格價網有電器舖最低賣HK$1,510，我搵咗間有現貨及可送貨的賣HK$1,600。

呢部跟焗爐相似，賣點係唔用油都可以做到油炸脆卜卜既效果，不單止不用油而且更可以將食物既油份迫約80%出來。正啱我呢種鐘意食香口嘢，但唔會開油鑊又怕食油既人。另一賣點就係預熱快，唔好似焗爐咁要慢慢預熱，又啱我呢種心急既人。

今日全日在家玩玩具，今朝一早去超市買食材，今日試整：麥樂雞、薯餅、三文魚頭、翠玉瓜＆雞翼。

午餐先來簡簡單單既雞塊＆薯餅，200℃+10分鐘，出來得2滴油。

同場加映沙律，食番啲蔬菜平衡番啲熱氣

再來跟bk啲jm整三文魚頭，用日本清酒加岩鹽醃魚頭1小時，先燒底部180℃+12分鐘，用錫紙墊住魚眼個面，不過忘記塗小小油，反轉撕開錫紙時魚皮黏住錫紙。

燒完底再燒面又係180℃+12分鐘，靚靚既日式鹽燒魚頭就攪掂。

今晚晚餐係日式鹽燒魚頭定食，魚頭外有沙律、面鼓湯＆日本米飯。

飯後甜品係自制乳酪雪糕。

飯後整明天的飯盒，有翠玉瓜及水牛雞翼。翠玉瓜切件再掃上小小橄欖油180℃+8分鐘。水牛雞翼用paprika加茄膏醃了一個下午，之後先醒起忘記放鹽，啲paprika又唔夠辣又冇咸味，味道一般唔收貨，不過就真係皮脆肉嫩有肉汁，yummy yummy。

再看看出來的油，真係好恐怖，只係煮了個魚頭、翠玉瓜跟雞翼，就有咁多油，諗起以前將呢啲油食晒落肚就覺得好恐怖。整體來說對呢件新玩具好滿意，不過發現一大缺點就係如果連續整幾味，後煮的會產生好大油煙，一定要開大抽油煙機再將廚房門關上才可以。

 有埋呢件玩具，我個廚房越來越完善，雖然更見狹小。不過食既質素可以更進一步，起碼今日就整了從來冇諗過會係屋企整既鹽燒魚頭。下個好想用呢部機整既係西多士，有jm已經試過可以用來整到不用油炸但效果一樣既西多士，用上home made麵包整西多士諗起都開心。