栗米三文魚抹醬

2009年7月30日

天氣熱又時不時落雨, 濕濕悶悶的冇乜胃口, 上完樂理課回家都唔知食乜好, 回到家打開廚櫃見到罐擺咗一段時間既三文魚罐頭就諗不如處理咗佢。今晚套餐既餐飲係凍檸賓。

材料: 三文魚罐頭....1罐

栗米粒.....隨意

沙律醬....隨意

做法:

先將三文魚攪碎再拌入其他材料攪勻, 我加多少意大利雜香草。法國長麵包切件用焗爐焗至香脆。

擔擔麵

2009年7月29日

意料不到的好味,因為有我鍾意既芝麻醬+花生醬....

材料:
担担麵.....1個
豬絞肉.....200g
即食搾菜.....1包
乾蔥.....1個
洋蔥粒......隨意
甘筍切幼粒......隨意

豬絞肉醃料: 糖、豉油、胡椒粉、鷹栗粉

湯底: chicken broth.....1杯

麵條醬料:
糖....2茶匙
豉油.....1茶匙
花生醬.....3大匙
芝麻醬.....3大匙
辣油.....2茶匙 (忘記放)
麻油......1茶匙
醋.....1湯匙
清水.....5大匙

做法:
(1) 將炸菜、乾蔥、洋蔥、甘筍切幼粒。
(2) 將豬絞肉用醃料拌勻醃入味(我早上返工前就醃好,放入雪櫃)。
(3) 麵用熱水煮5分鐘至熟, 盛起隔去水份。
(4) 用同一鍋煮沸雞上湯。
(5) 麵條醬料先混合, 芝麻醬跟花生醬比例隨個人喜好調整。
(6) 下油, 將豬絞肉炒成碎粒, 再加入榨菜、洋蔥粒, 甘筍粒及乾蔥炒勻。
(7) 最後倒入麵條醬料煮至汁變濃稠,即可熄火。
(8) 湯碗放入麵條, 加雞上湯, 再舖上担担麵醬。

香草新丁(3)

2009年7月29日

7月1日係花墟買了一盤九層塔, 又買了甜羅勒同芫茜既種子。做過一次好味既青醬,又想整第2次, 不過整一次要用好多甜羅勒既葉, 一盤甜羅勒不足夠整一瓶青醬。想讓甜羅勒開枝散葉,可以用插枝既方法,不過原株俾我剪走一截後就死咗, 即係得不償失。惟有試下用種子種, 雖然要花多啲時間,不過滿足感會更大。

7月5日下種子
7月13日小苗出來了
7月18日將健壯的小苗換盤
7月29日長出6片葉了

小插曲: 6月30日-7月1日2天不在家, 沒有定時淋水, 回家時8株小苗全部瞓低, 以為全死掉, 馬上淋水搶救, 隔天早上幸好有6株企番起, 當時真的很開心。最後5株最健壯的成功換盤。

至於芫茜已經落過2次種, 一次有浸水, 一次冇浸水, 同樣冇發苗, 未知是否種子有問題, 要再研究。

香草新丁(2)

2009年7月29日

5月28日買咗一盆迷迭香, 一盆甜羅勒(上圖), 再加一盆白色蝴蝶蘭。2個月後慶幸3盤都冇比我全部整死。

呢張係7月7日影, 最右邊盤九層塔係7月1日買。中間盤甜羅勒俾我食剩番好少葉, 同埋中間嗰株俾我剪了去插枝, 當時仲未死。

迷迭香

唔知點解盤迷迭香唔識大, 剪咗部份去煮食, 又剪咗一節去插枝 。睇落冇乜問題只是唔識長高長大, 落埋肥去催谷都唔得, 要研究吓點解會咁。插枝既小苗未知道是否成功, 我諗過多一星期就知道啲根生出得好唔好, 希望出多啲根,咁又多一盤迷迭香。

甜羅勒 甜羅勒本來一盤有三株, 我將其中一株剪去插枝後,剩下既葉自己掉落後就成株死咗, 死因不明。剪出來插枝既小苗就好健康長高咗唔少(不過跟同日插枝既九層塔相比,甜羅勒既生長速度就比較慢) 。上圖係今日影, 加左肥催谷又忍手冇搣來食,盤甜羅勒(左邊嗰盤)啲葉狂標, 對比上一張啲葉零零落落係咪差好遠。不過因為窗台唔係咁猛陽光, 甜羅勒既葉係全部係dum頭的。

蝴蝶蘭
早前天氣太熱, 蝴蝶蘭未開既花胞未開花就消胞, 見唔會再開花就將佢大修, 將花枝剪走, 將爛根的爛部份除去, 換過新既水苔。之後中間出了一片新葉, 不過就死左2塊舊葉, 啲根由青綠轉為瘀綠色, 健康狀況非常之不明朗, 依家只有聽天由命。


九層塔
加咗肥之後,九層塔對比剛剛買回來既時候足足大咗一個size, 7月18日同佢換咗個大啲既盤,佢又長高咗, 怪不得人人都話九層塔粗生,果然如此。另外, 剪了一段九層塔去插枝, 又係勁快長大(下圖) 。




種植既樂趣在乎啲植物快高長大又可以開枝散葉, 而我種香草仲可以將佢地食落肚, 又食得又玩得又係一樣好好既興趣。

涼麵

2009年7月28日

關東煮+青檸梳打

2009年7月20日

呢個又係懶人餐:

1) 白蘿蔔批皮切約1吋厚, 加雞湯(蓋過蘿蔔)煮20分鐘至軟身;

2) 之後加獅子狗卷、嗚門卷、蟹柳、魚片頭、海帶及椰菜, 再煮沸, 落鹽調味即成。
3) 關東煮既沾醬: 本來是用味噌整沾醬, 不過屋企冇味噌就用泰國酸甜醬代替, 沾醬: 泰國酸甜醬+麻油+日本醬油+辣椒油+芝麻。

-->其實關東煮既材料可以好隨意, 基本上可以有乜放乜, 不過放既當然主要係日本既食材啦。同埋湯頭應該係用海帶或木魚肴湯, 不過時間關係, 我用chicken broth代替, 所以呢個係"仿"關東煮, 不算係真真正正既關東煮。

青檸梳打: 青檸1開2, 梳打水一罐, 冰糖糖水(1公升清水煲溶1包太古冰糖, 攤凍後入樽, 可以加係任何夏天既冰凍飲品內) 。將青檸略搾汁, 加梳打水, 再用糖水調至喜歡既甜味-->呢排咁熱, 飲完勁爽。

一口吉列豬扒+照燒茄子

2009年7月18日

照燒茄子

(1) 茄子半條切片

(2) 燒熱LC pan 然後掃一層橄欖油

(3) 放茄子再掃一層橄欖油在茄子上面, 加少許黑胡椒鹽,

(4) 收細火慢慢煎

(5) 煎至茄子軟身, 淋上照燒汁, 便可關火。

一口吉列豬扒

材料:

冇骨豬扒---1塊
日式黑胡椒鹽---適量
雞蛋---1隻
麵粉---適量
日式麵包糠---適量

油炸做法 (如圖):

(1) 豬扒用刀背拍斷筋膜, 再切成小件(我是1開6)

(2) 用黑胡椒鹽醃15分鐘

(3) 依次序將豬扒均勻地沾上麵粉, 雞蛋漿及日式麵包糠

(4) 加適量的油落鍋加熱, 用木筷子試温度, 如有小泡升上來, 就表示夠熱, 可以放豬扒落去炸

(5) 豬扒浮面表示已熟, 如果色水未夠靚就炸多陣至兩面至金黄色, 便可取出放在廚房紙上吸去多餘油份。

免油炸做法:

(1) & (2) 同上

(3) 放牛油入平底pan燒熱, 加日式麵包糠, 將麵包糠炒至金黃色

(4) 依次序將豬扒均勻地沾上麵粉, 蛋液及已炒過的麵包糠

(5) 放入焗爐以160度, 焗20分鐘。(我屋企係用微波焗爐, 嗰焗爐已經有預設程式整呢類餸)

兩個方法我都試過, 比較香口既當然係油炸啦, 不過免炸又真係感覺上健康啲, 同埋用油炸要好多油好浪費。外觀上如果啲麵包糠炒得靚(要俾多啲心機先可以炒到所有麵包糠一樣金黃色, 呢part最難) , 油炸同用焗既個樣冇乜大分別。

沾醬: 簡單既可以點泰式甜酸醬(如圖)或者茄汁; 多少少功夫就可以將pickle切細粒加沙律醬拌勻做沾醬。

血光之災

2009年7月7日

上得山多終遇虎, 入得廚多切手指。

事源是想一刀劈開個椰菜, 刀鋒偏了角度, 劈去了左手食指的一块肉, 不覺痛只見血流如注, 捂住傷口成2分鐘仍未見有止血的跡象, 除藥水膠布外，屋企冇其他first aid既用品。惟有落樓去診所搵醫生求救，點知見醫生先至知乜野叫痛。洗完傷口傷口繼續流血, 因為係整块2-3mm既肉刮了出來，根本冇得用針線縫合，醫生話最見效既方法係用電，電死條血管等佢唔可以再出血，因為用電擊個傷口會好痛，所以要先打麻醉針，就係咁醫生先係隻手指左右2邊各打一針, 手指佈滿神經線打針落去超痛，打完後一分鐘左右醫生就試電左一下，啲麻醉藥都未到，電落去嗰一下痛到我彈起兼標眼淚。醫生見我咁痛又再係我手指度打多一針麻醉藥，過多一分鐘就再電，總共電咗4次，電嗰陣都仲係好痛，不過唔係痛到嗌救命個隻。最終隻手指被拮了3針又電咗5下之後先完全止血。

手指唔可以濕水，出了診所要先去買first aid用品及防水用品，再去買飯醫肚，跟住嗰2個星期都唔可以練琴，所以把心一橫走去租dvd睇。本來今晚應該係簡簡單單煮完飯食後就練琴，練完琴就瞓覺，結果整晚我就係“豉油花園”騰來騰去，四出張羅，幸好“豉油花園”夠方便，不然會更煩。

2日後返診所洗傷口兼換藥，醫生摵走紗布時仲見有血出，換左塊人造皮令個傷口快啲長番啲肉出來，傷口較深要長啲時間先可以完全癒合，下圖係一星期後再換新既人造皮時攝，嗰傷口已經縮細咗同埋嗰窿已經冇咁深，不過仲有啲痛同仲未可以打字同彈琴，真係令人沮喪。

蒜香雞軟骨

2009年7月11日

材料:

雪藏雞軟骨一包 - 凍肉舖有售 (唔知點解超市冇得賣; 凍肉舖才有 )

蒜鹽一樽

做法:

(1) 雞軟骨用熱水浸半小時解凍

(2) 用廚房紙吸乾水份

(3) 加適量蒜鹽醃最少3小時

(4) 平底pan或鑊不用加油, 用中火炒雞軟骨至金黃色及香口便可
(5) 雞軟骨會出油, 所以不用放油

(6) 用廚房紙吸乾油份, 試味, 如果唔夠味可以再下蒜鹽調味

(7) 因為之後仲可以調味, 開始時不要落太多蒜鹽, 以免過咸

(8) 如果唔鍾意蒜味, 可以改用椒鹽(不過我未試過, 下次會試吓)

三文魚寶雲酥

2009年7月10日
呢個菜名係來自生果日報某一天既食譜, 我將佢既topping材料略為改動, 變為依家呢個版本。

材料:
三文魚......1件
蒜蓉........一匙
白汁........適量
洋蔥.......4份一個
意大利雜香草........適量
黑胡椒鹽........適量

做法:
(1) 洗淨三文魚抹乾, 用少許黑胡椒鹽略醃
(2) 洋蔥切小丁, 蒜頭切細粒
(3) 平底pan加橄欖油, 爆香蒜蓉加洋蔥炒至軟身
(4) 加白汁煮至滾起熄火
(5) 錫紙上掃一層油, 將三文魚放上, 魚皮向下
(6) 先舖白汁在魚面, 在上再加麵包糠及雜香草
(7) 預熱焗爐, 以160度焗20分鐘至魚熟及麵包糠轉金黃色便成

磨菇湯

2009年7月6日

昨天用了半天煮食, 今日放工回家後完全沒有整晚餐的mood, 煎餃子時才記起有串燒, 見到肉食太多但屋企又冇菜, 只有昨天整雞卷剩下的磨菇, 咁磨菇湯自然係最簡單的選擇。

印尼沙嗲串燒

2009年7月5日

先放圖後補文字

蘑菇釀雞卷

2009年7月5日

菜譜來自"三餐", 作者: 蘇三。

免炸吉列蝦仁 + 芥末薯仔沙津

2009年7月4日
芥末薯仔沙律的菜譜來自"三餐", 作者: 蘇三。

免炸吉列蝦仁的菜譜來自"BB牌沙律醬"附送的菜譜。做法超簡單:
(1) 留尾蝦仁數隻
(2) 蝦仁先沾上沙律醬再裹上麵包糠
(3) 放入已預熱焗爐, 以180度焗15分鐘

叻沙

2009年7月3日 先放圖後補文字