2020 B'day

2020年1月23日

難得疫情下死黨仍出來跟我慶祝,
據說在嚴峻疫情下能跟你食飯的都是生死之交。

重整衣帽間 Part 2

2019年2月17日

信奉舊老闆的一句至理名言：

out of sight; out of mind!

所以重整衣帽間除了掉衫外，

就是如何organise衣物，

令自己走出唔記得自已有咩衫，

配襯時老覺得衣櫃小件衫的迷思。

 上youtube學如何褶衫，

呢個係Marie Kondo褶衫法的進階版：

口袋式褶衣法。

就是抽出一件衫時都唔會整散其他衣服。

上淘寶淘櫃桶用隔板，將櫃桶分開幾行，

每行可以收納的衣物是以前的幾倍，

最重要是一拉開櫃桶就可以一目了然，

比以前搵衫的效率高太多。

學懂如何褶衫原來是如此重要！！

重整衣帽間 Part 1

2018年12月16日

全屋最不滿意的地方就是衣帽間，

衣物手袋太多，

趁尚在病假中將整個衣櫥執空，

重新規整，

規整前係youtube先學摺衫，

衫摺得好係可以令衣物井然有序，

摷出來的時候不會攪亂其他衣物。

 讀書時代到現時的衣物都有，

數量驚人，清走1/3衣物。

入伙以來第一次全清。

足足用3日才清理好所有衣物。

解救了一直堆放衣物的一面牆，

重新布置，貼上買了多年的牆貼，

舖上地毯，再放張designer chair，

提升整個房間的格調。 

完成電療

2018年12月7日

今日最後一天到LG3報到。

整個療程唔辛苦，

只有間中一兩次等候時間較長，

大部份時間等半小時就可以做治療，

而且護士及放射治療師都好OK。

中醫煎藥

2018年11月28日

每月回陳建萍覆診，

醫師不喜藥粉，

堅持煎藥才能發揮藥物的最大功效。

 經過一段時間訓練，

已經成為煎藥小能手。

再劃位

2018年11月27日

完成15次大範圍，今日返設計室，

再劃線準備做6次針對性治療。

 今日又等足3個鐘至見到醫生，唉!

開始電療

2018年11月8日

今日開始21次電療，

15次大範圍，6次針對性。

每次都是先付款，穿手術袍，

等叫名，做治療，

取得明天治療時間。

一星期五天每日到醫院接受放射治療。

設計室

2018年11月1日

10月22日返馬醫生再照一次ultrasound。

10月24日陳建萍覆診。

今日到瑪嘉烈放射治療科做設計，

就係在身上畫需要電療的位置。

又做了一次CT scan。

今日好順利，一個多小時便完成所有程序，

難得不需漫長的等待。

完成後就到排機器，

機器有期醫院會電話通知

開始15+6的電療日期。

中西合壁

2018年10月11日

昨天第一次睇陳建萍，

開始了中醫西醫雙本齊下的治癌之路。

今日第一次去瑪嘉烈腫瘤科，

等了3個多小時，

醫生睇病歷後做了觸診檢查，

確認了主診醫生只做放射性治療

及荷爾蒙治療的方案。

排期11月1日去放射治療科做個案設計。

荷爾蒙治療 - 即係食10年Tamoxifen。

入院 - Day 4

2018年8月31日

食埋個雞粥早餐

等埋馬醫生巡房

就回父母家開始寄居生活 

頭2星期每星期回馬醫生診所檢查傷口，

其餘時間足不出戶，

每天上網搜尋以後的飲食要如何調整，

網上對癌症的飲食資訊多到爆炸，

什麼療法都有，

西醫說什麼也可吃只要均衡便可，

但真的嗎？

最起碼知道癌症患者不能食燕窩，

燕窩以外還有什麼要戒口，

便是這一段養病其間的搜索工作。

最後搜到這網址寫的比較靠譜，

https://blog.xuite.net/cherry8888/twblog/336793616。

入院 - Day 3

2018年8月30日

仍留在醫院休息

早餐：雞粥

午餐：encore昨天的雞絲通粉

晚餐：蕃茄雞柳飯

多謝老闆們及老友的探訪，

等我冇咁悶。

打了藍色同位素，

變了亞凡達，整個人皮膚泛藍。

馬醫生今日差不多零晨至巡房，

不過帶來好消息病理報告中

癌細胞屬性跟抽粗針一致，

劇情冇反轉，

放下心頭大石。

多謝醫院神速出報告！

明天可以安心出院回家休養。

入院 - Day 2

2018年8月29日

早上先打同位素，

支針拮入胸部勁痛。

11:00 先照腸胃鏡，

12:00轉去手術室開始手術，

15:00完成手術上房。

我差不多15:20就清醒，

沒有麻醉後的副作用，

身上多了2個傷口，

冇淋巴擴散所以只切了腫瘤

及最接近腫瘤的3組淋巴。

呢個已經係最低消費！

晚上8:00晚餐。

醫生到晚上11:00先巡房，

聽聞今天醫生已經做了3台手術，

驚嘆呢個病係香港真係好普遍，

另做外科醫生真辛苦！

入院 - Day 1

2018年8月28日

因為要做正電子掃瞄，

所以要一早入院。

 未入房就先去做掃瞄，先打同位素。

 等半個鐘再開始。

攪掂上房。 

今次順便做埋腸胃鏡，所以晚餐只可以食粥水。

手術前

2018年8月24日

20日下午返工司跟老闆請假

及告之病情，

因為要搬回父母家方便手術後照顧，

所以要提早星期六搬家，

一天內要將重要的工作交給同事，

忙到爆炸。

   21日上午再約見馬醫生，

所有報告出齊，

11及1點陰影並非癌細胞。

手術就變得簡單，

只需要局部切除。

約定28日入院，

29日手術。

22日將所有報告拎去張ｘ儀醫生

攞second opinion，

約了3點半等了3個小時，

到6點多才見到張醫生，

再做超聲波，

最終診斷跟馬醫生一致，

大家終放心。

可以開始準備手術及搬家。

手術前要洗牙及剪頭髮，

23日洗牙是以免手術後一段時間

抵抗力差時會容易引發牙病。

24日剪短頭髮方便手術後

家人幫我洗頭。

剪完頭髮再去馬醫生醫務所簽字手術。

整個星期非常忙，

沒有多餘時間胡思亂想。

飲食新世界

2018年8月19日

呢啲存貨絕大部份以後都唔食得，

全部要送人。

 呢啲都係

 多謝好姊妹送的營養粉。

 依家要轉食呢啲。

 仲有呢啲

癌細胞屬性

2018年8月18日

今日見馬醫生，

所有報告係手，

咁就知道究竟隻癌有幾惡，
有冇得醫，同埋可以點醫。
乳癌期數以腫瘤大小，有沒有淋巴及遠端擴散決定期數。

我是2A期因為腫瘤大小是2.2公分，
沒有腋下淋巴轉移。
但期數沒有說明隻癌有幾惡，
按癌細胞屬性，
乳癌可分為5大類：

幸好我是管腔A型，

暫時定的治療方案是手術加電療，

最終方案要等手術後出埋病理報告再落實。

再生支節：超聲波發現11及1點位置有陰影，

為免有意外，2處再抽粗針化驗。

21日再睇報告及落實手術方案（全切or局部）。

睇完西醫，再去油麻地睇中醫。

另在家人強烈要求下搵

張Ｘ儀攞second opinion。

一星期內睇幾個醫生，

幸好我一向體力及精神好好，

食得瞓得唔係又要返工又要準備手術又要四處奔波，

唔病都玩到病，

其實唔係摸到腫塊，

都唔知自己身體咁脆弱！

第一個報告

2018年8月15日

上周乳健中心打電話告之

報告已出，

個腫塊應該唔係好嘢，

約了今日做詳細的檢查。

第一次見馬國權醫生，

佢睇完超聲波及乳房造影報告後。

好直接話我知係乳癌2A期，

不過癌細胞的屬性及有幾惡就要抽粗針再化驗，

所以即場做埋抽粗針，

抽粗針後星期六直接到馬醫生醫務所睇報告，

然後再決定下一步。

一直冇畀家人知道，

係時候要面對。

https://www.breasthk.com/

上面的網址非常有用，

每一篇我都有細心閱讀，

每篇都深入淺出的介紹乳癌

及在香港的一般治療方案。

而作者正正是馬國權醫生，

所以沒有太多猶豫就選定他做我的主診醫生。

升降電腦桌

2018年8月13日

 升降電腦桌

賣家送的電腦支架，整體好滿意。

自2014年條頸有事，

做了物理治療2個月至痊癒。

之後開始多注意坐姿，

又換大班椅又加backjoy，

但免不了每日都要坐好多個鐘。

又要記淘X一功，

以不太貴又唔洗大攪office，

又容易安裝的條件下，

買到一張升降電腦桌，

可以減少坐定定的時間，

企多啲健康啲。

斷捨離 - 打皂

2018年8月4日

生活就是經歷一個又一個循環，

由探索到了解到完結再到拋棄。

早幾年開了許多火頭，

係時候一一將之梳理，

需要熄滅的火頭就盡快處理。

首先是打皂，幾年前興致勃勃，

如今失了興致，

幸尋得有緣人接收，

希望有緣人能比我更好運用

這些工具，發揚光大。

勿忘初心

2018年7月31日

一直在考慮是否將2018年8月至年底

這一段生病時間作個記錄。

養病的日子沉悶乏味，

但這個病確實影響了我生命的軌跡，

寫blog就是想將個人生命的軌跡記錄下來，

所以猶豫不決了一些時間後還是決定寫下來，

記念這120天的點滴。

要完全戰勝病魔還有很長的路要走，

因有家人及朋友的陪伴，

我會努力走好以後的路。

7月某日沖涼時摸到左胸有腫塊，

心知不妙，

心存僥倖希望只是一般的乳腺增生或水囊，

預約今日到乳健中心做超聲波及乳房造影檢查。

慶幸有乳癌基金會，

當發覺乳房有問題時知道去哪裡找協助。