2012年1月29日
初四開工，即刻中招，午飯時跟一高層吹水，當晚該高層發燒（原來佢早一天已經不適），我就開始有感冒徵狀，馬上出動喉糖，感冒沖劑等等，但始終不敵惡菌，最大件事係令我無法完成schedule了在1月29日在比賽前最後亦係最重要的一課長課，急忙去睇醫生，今次感冒引來氣管發炎，現在可否參加2月5日的比賽都成疑問。10個慘情。
2012年1月30日星期一
病人餐
2012年1月30日
一個人生病最慘就係病都要張羅早午晚三餐，唔想換衫落樓買飯，唯有係雪櫃摷，係冰箱清出一隻春雞、二塊豬扒、十隻雞翼，豬扒用糖豉油麻油醃好、雞翼用基本醃料加mustard醃，醃好就去食藥午睡，瞓醒就將食物用錫紙分開包好，同時放入焗爐焗25分鐘。這個做法最省氣力，又唔要睇火，再煮個意粉加2大匙意粉醬攪均煮熱上碟，呢個份量足夠頂2-3餐。
雖然生病都不可以白白糟蹋一只春雞，用剩下的2磚南乳加蒜蓉搗碎後，用手捽均雞全身，醃一個下午，後放入焗爐焗40分鐘。
今次醫生開的全是眼瞓藥，醃好所有肉後就食藥跟住去午睡夢周公，飯前全放入焗爐，省卻睇火的功夫。呢盤菜又可以頂一日。
病時應該食啲簡單的食物，偏偏家裡就缺乏材料，呢啲都係病之前諗好的做法，冇力氣再諗點樣配搭家裡有的食材，惟有硬著頭皮根據之前諗好的然後將做法盡量簡化。
睇落好豐富，其實並不需要花許多時間去處理，當然如果能多花時間將細節做好，出來的味道會更好，不過實在沒有精力，只求有飯開。
2012年1月29日星期日
【包餅工房】P仔 - Focaccia
2012年1月29日
本來這個Focaccia是準備outing時給小朋友吃的，因為生病在家變成自己的口糧。
另外又整了這個cream cheese apple muffin，又係變為早餐。
2012年1月26日星期四
Royal Copenhagen 入門
2012年1月26日
下午開市，出發去公司前，剛巧UPS送過年前訂的靚靚瓷器到家，收好貨後匆匆出門。
晚上飛快回家開箱，Seafood痕，要求瓷器全部gift wrapped。隨盒附送2本靚靚catalogue。
花紙用blue fluted mega的圖案。
初入門由discounted price items入手，買夠Euro150全球免費送貨。
買了2只樹葉碟、2只菱形碟、一只普通圓碟、一只大瓷蛋和一只小瓷蛋。
由LC的stoneware開始中了瓷器毒，現在一見靚靚既bone china就雙眼發光。Royal Copenhagen的手繪瓷器相對英國的Royal Albert, Wedgwood，日本的Noritake, Narumi均偏貴。平日用真的很奢侈。
所以有人喜歡只作收藏，不過我買番來就一定會用，如果用的話就有機會跌爛，所以都係買啲平小小的，跌爛都冇咁肉赤。
用作收藏就買飾品類如今次的大小瓷蛋，蛋上的圖案全是人手繪畫，靚到冇朋友。
2012年1月25日星期三
2012年1月24日星期二
跑步日誌 2012-Jan-24
2012年1月24日
今日的目標是21公里，由荃灣西鐡站跑至小欖後折返，今日係10個凍在海邊我估計只有6-7度，warm up時有絲絲微雨，勁大風，跑過深井後轉大雨，又濕又冷，雖然下雨跑步是10個cool，不過病了可不是講笑的，最後都係打車折回起點回家泡個熱水澡，今日的成績只有6.78km，練習失敗。
晚上去了寶哥味館打邊邊去去寒氣。
2012年1月21日星期六
跑步日誌 2012-Jan-21
2012年1月21日
年尾收爐前最後一次長課，路線是很久沒有跑的青山公路由荃灣西鐡至豪景花園一段，來回共16km。今日天氣清涼，都跑得幾舒服，自從改過跑步姿勢後，跑得冇咁吃力，耐力有少少改善。希望年初二的21公里長課都可以好似今日咁順利完成。
2012年1月18日星期三
2012 另一個B DAY CAKE
2012年1月18日
今日係老爸正日的農曆生日、明天是我的新曆生日、兼且又要食團年飯，時近年尾冇可能逐件事分頭慶祝，於是今晚係觀塘聘珍樓食餐勁既一併解決呢3件事。
多謝Mr. K一如以往的供應優質紅酒。Judy千辛萬苦的出錢出力的帶來了一個靚靚蛋糕。
2012年1月15日星期日
【包餅工房】P仔 - 馬拉糕
2011年1月15日
P仔BMS104型號比之前的型號多了一個容器，呢個容器可以用來溶朱古力又可以用來蒸糕。今日就用在親子王國內的馬拉糕食譜，食譜是用鑊去蒸糕，今次試用P仔去蒸糕。先將麵包容器拎起葉片，加100ml水在麵包容器內，將馬拉糕材料拌勻後倒入蒸糕容器，蒸糕容器套在麵包容器上面，P仔預設的蒸糕時間是35分鐘，之後再有追加時間功能，因為天氣凍我追加蒸多5分鐘，出來的馬拉糕好ok，除了中間有小小未熟透，下次可以再追加蒸多10分鐘。
呢個蒸糕function超讚，第一用水小，只用100ml，40分鐘後仲有水在麵包容器內，第二預較function唔洗睇火同睇住有冇燒乾水。
大成功，再一次證明P仔冇甩拖。
2012 第一個B DAY CAKE
2011年1月15日
有幾個朋友每年都好有心，記得我生日同埋會同我慶祝，反而我就成日唔記得佢地生日，我係咪好衰！！？？
今年收的第一個生日蛋糕，好開心。Thank you C, I 同Y三位靚女。仲有要特別鳴謝I,C及LC一家的打邊邊大餐。
跑步日誌 2012-Jan-15
2012年1月15日
今個星期忙爆，今日亦只能抽出一個小時練習，下午3時開跑，開始時是毛毛雨，雨勢越來越大，幸好今日氣溫不算低，跑時都幾舒服，反正在夏天跑步時已習慣全身汗濕的感覺，下雨的濕透不會令人特別難受。平日熱鬧非常的青衣運動場，因為下雨今日幾乎沒有人，有幾個時段只有我一個人在跑圈，我覺得自己cool得很hahaha。
未嘗試過在下雨天練跑，今日增加了下雨天跑步的經驗，如果比賽日下雨都多小有些心理準備。
2012年1月13日星期五
2012年1月13日 煮飯週記
2012年1月13日
工作忙連煮飯的心情都受影響，又天寒地凍，上星期打了2天邊邊口內即生了一粒飛滋，攪到唔敢繼續打邊邊。唔想花心思煮食，但仍要濟五臟廟，只好揀些即食材料。
星期日：臘鴨腿、臘腸煲仔飯
星期一：XO醬炒蘿蔔糕
星期二：炒飯
星期三及四：味千拉麵+打邊邊剩下的丸丸
星期五：終於撐到星期五，唔想動腦筋諗食乜好，雪櫃有包咖哩魚蛋，就事旦係超市買了魷魚鬚、蘿蔔加埋冰箱內的牛腩，整咖哩蘿蔔牛腩，配埋個蝦子麵又一餐，可惜買唔到豬皮，唔係就可以整正宗的車仔麵。
2012年1月12日星期四
【包餅工房】P仔 - 法國白麵包
2012年1月12日
今個星期忙到冇朋友，整吓包包減吓壓。5小時法國麵包，法國麵包的特色就係麵包皮特別脆，ｐ仔真係永無甩拖，出來的包包個皮就係法國長條麵包個種脆脆的質感，內軟外脆好得呀，下次要試將面糰拎出來，直接做成長麵包的型狀，或者整成豬仔包都可以。好耐冇試過淨食白麵包都食得咁滋味。
今日其實都唔係咁順利，本來想試快速程式2個小時就有麵包出爐，2個小時後打開機蓋，才發現沒有安裝好攪拌用葉片，即係摩打只係空轉，材料完全沒有混合過就烤焗，最後當然是完全失敗，全部材料要進垃圾桶。
夜已深但死心不息，又不可能再等麵包出爐，變為用預訂程式，晚上下料，預較早上8:00麵包出爐，早上起來一屋麵包香，有新鮮出爐的麵包做早餐，享受過後繼續回公司努力。
今次有一新嘗試，就係用在iherb買的active dry yeast而不是用instant yeast，用active dry yeast比用instant yeast麻煩小小，不過既然已經買咗，就即本用下去。
2012年1月8日星期日
2012上海公幹飲食篇
2012年1月8日
3天2夜上海公幹，第一天晚餐在The Kitchen Salvatore Cuo吃，主要係食地方，前臨黃埔江望向以前閘北一帶，open kitchen，店內有一大烤爐，pizza即叫即整即焗，皮薄而juicy，另外點了2款意粉質素一般，400g牛排3人分食算ok，甜點tiramisu強差人意，餅底不夠濕潤。
早餐在酒店內解決，酒店的早餐算中上水平，不過最好味都是即煮的麵條，一碗3-4啖就食完，不過麵質實在好。
第二天午餐去Shangri La中菜叫點心，其實真的很不明白，為什麼在上海都係去食廣東菜，點解唔係食地道上海菜，我想食上海菜。
第二天晚餐是酒店Annual Dinner聚餐，滬式八小碟ok，其他主菜就一般，酒店Annual Dinner菜式，沒有期望就不會失望。
第三天午餐又是身不由已的去了蘭桂坊，我是12:30到，今天下雨氣溫得3-4度，街上冷冷清清，推門入店內即刻傻眼，店內擠滿客人好不熱鬧，跟街上對比強烈，幸好我隻身一人易找位置，上次食黃魚麵好失望，今次改食招牌鱔絲麵，好好味。雖然是簡單的醬油湯底，可能是天氣關係，食時暖笠笠，麵條是一如既往的好，不過麵條份量好像小了。因為這家是老式店，等待的客人通通站在你身後，不能慢慢享受，食完就得馬上起身。這一餐是我在上海食得最心滿意足的一餐，食完可安安樂樂的坐下午班機回港。
不算正餐但都是超滿足的就是去我介紹過很多次，而且係每次去上海都會跑去食的小楊生煎，水準一如以往的好，RMB6/四粒好好味的生煎包。依家一邊寫仍然一邊在回味yummy yummy。
2012年1月7日星期六
2012上海公幹購物篇
2012年1月7日
忙裡偷閒，偷出時間去南京東路shopping，雖然人仔好貴，不過仍然執到不少平宜貨，而且有些貨品在國內縱然是在上海的黃金購物區，仍然會比香港便宜，下面就是我的血拼實錄。
(1) Uniqlo
今年香港凍得遲，Uniqlo換上春裝，寒流才襲港，讓香港Uniqlo大失預算。不過上海仍有大把貨，而且是好康的減價貨。
香港賣HK$199的冬天家居服套裝，在上海特價才RMB79，以1.25算都係HK$99，50% discount。
長羽絨服RMB599，折港幣為HK$749，不是平宜很多不過問題是香港已經冇貨賣。
(2) 三陽南貨店
大陸太多食品問題，要買都係去老字號比較放心，這裡最抵買的是金華火腿，抵買中的抵買是原隻豬腿買，不過香港潮濕存放是一大問題。今次買了2件（一件是預先包裝，一件是即切，即切大約貴20%），每件約重1kg，合共RMB324，你在香港新三陽也好老三陽也好，這個價錢絕對買不到同一份量。三陽南貨近歲晚人超多，去貨好快，不怕買到陳年舊貨。
(3) 美珍香
香港也有美珍香，不過國內的美珍香訂價比香港便宜很多。即燒蜜汁豬肉乾特價RMB79/500g，即HK$99，香港的價錢是HK$160/500g，38% discount，國內的生活水平仍未及香港，因此這類算高檔一點點的零吃訂價會比較便宜，但質量卻是一樣。
只有2小時空檔，在人超級多的南京東路可以血拼了這幾樣超值貨加上走去食埋小楊生煎，不得不佩服自己動作神速。
2012年1月5日星期四
2012年1月5日 煮飯週記
2012年1月5日
今個星期煮飯至星期四結束，星期五／六／日會在上海。
元旦日：有咁大個人第一次整的蘿蔔糕
星期一：韓式人蔘雞鍋
星期二：人蔘不可以跟蘿蔔同食，說會“破氣”令我星期一好想食都唔敢食蘿蔔糕，今日晚餐煎蘿蔔糕＆洋蔥湯。一頓晚餐就可KO大半底蘿蔔糕。
星期三：今日氣溫驟降，天氣凍最好就係打邊爐，三兩下手勢就攪定可以開餐。今日專誠買鯪魚肉可以用我早前在淘寶淘到的魚滑刮工具。今日是麻辣湯底。
星期四：今日比昨天更凍，繼續打邊邊，不過8:15要去學琴，所以趁午飯後空檔去超市買餸，回家後便可馬上開餐，日本超市就是比較貼心，買了的餸菜可以寄存在店內的冷凍locker內，放工去取回便可直接回家，不怕餸菜放在公司會變壞。今天是豆乳鍋。
今日多了些丸，飽到撐著，大滿足。不過湯底比較咸，要不停加水。
2012年1月3日星期二
【包餅工房】P仔 - 火腿芝士包
2012年1月3日
除了焗一般的方包外，P仔還有一個非常好的function就是“有餡包”，function#10 - 先將材料放入機內按一般方包程序整包，中間有15分鐘暫停時間，可以將麵糰拎出來包入／捲入餡料，再將麵糰放回機內繼續發酵及烘焙。
今次我將火腿及芝士捲入麵糰中，出來就是火腿芝士包。不過今日係失敗之作，因為需要落3g酵母，而家中只剩1g都不到的酵母，個包包根本發不起，變成發育不良。不過除了口感較差外，包包的味道其實不錯。
這個function令包包的變化更多，咸包可以捲入芝士；甜包可捲入紅豆沙／朱古力醬；或其他餡料。
2012年1月2日星期一
韓式人蔘雞鍋
2012年1月2日
這個菜本來是預備在冬至那天做完天灸後回家吃的，但因為腸胃炎，去不了做天炙，當天也沒有力氣去做這個菜。
人蔘雞鍋－材料跟做法均好簡單：鮮人蔘一支(Piago有賣)、紅棗(我用了3粒大的)、糯米和春雞，我用法國春雞，先洗乾淨春雞，再用滾水沖一下雞腔，將人蔘、紅棗跟糯米釀入雞腔內，用牙簽封好頭尾，放入煲中煮2小時(我用高壓煲30分鐘攪掂)，最後加鹽調味。
紅棗要先去核，紅棗是用來吸收燥熱，煮好後棄掉不吃。
加水至剛浸過雞背，因為用高壓煲水份不會減少，我用明火再煮一會，將湯汁收濃。
煮了2小時，整只雞已經煮到散架，用輕力就可劏開，好香的人蔘味，糯米跟蔘湯暖胃，這個菜真的很適合在冬天食用，怪不得韓國人常吃。
越來越愛家裡的電子高壓煲，煲湯、炆肉、蒸糕、煮飯都永無甩拖，又唔洗睇火，真正的value for money。
2012年1月1日星期日
2012年 煮食第一炮 - 蘿蔔糕
2012年1月1日
自小媽咪每年都會整蘿蔔糕，自家整的糕材料特別豐富及好味，今年去鏞記買了臘味，正好用來整蘿蔔糕。菜譜是多年前在報紙上剪下的，材料份量各樣都ok。收集了不少菜譜，但不是所有菜譜整出來的菜都好味道，真的要試過先知道。
在Piago買的日本蘿蔔，一條約2斤，剛好跟食譜的份量一樣，省卻換算的功夫。用料十足：臘腸、臘肉、蝦米跟江瑤柱，沒有加冬菇，如有冬菇，蘿蔔糕會好快變酸。
蒸之前
蒸出來冷卻後成型
晚上同場加映：蟹粥
是日晚餐：蒸蘿蔔糕和蟹粥
去Piago買蘿蔔，入冬後每次逛Piago都會見到這個煲仔菜，今天手癢買了泰式紅咖哩雞煲回家試下，味道ok，份量都ok。
已經連續幾個星期沒有在家好好的休息，正好趁這兩天在家自閉，好好的休息，以煮食減壓。
訂閱：
文章 (Atom)