Project U - 電器篇(2)

2012年10月13日

9月底初步決定買咩電器，之後因為煤氣喉問題，及在網上再扒文，最終訂的電器跟9月底的預案有好多改動。

冷氣機 - 冇變，因為幾乎係冇得揀，只有Panasonic窗口式分體可以揀得落手。

洗衣機 - 冇變，冇用過洗衣機，唔識點揀，扒文後金章好似比較好，又唔貴，試吓先。

雪櫃 - 冇變，第一件決定的家電。

抽油煙機 - 牌子機型不變，不過size由600mm改為700mm。

Built-in oven - 係網上睇到一篇教揀built-in oven的文章，睇完後再扒文，最後唔要Whirlpool改為買Electrolux最新的型號EOC5851AAX，價錢都貴了好多，但function比較齊全。


洗碗碟機
呢個又係over budget，本來係揀Electrolux香港網頁上的一款洗碗碟機，不過原來香港代理冇入貨，最後係Whirlpool和Seimens二揀一，最終揀了Seimens SR26T291EU，比Whirlpool省水及電。


電磁爐
P記太大部，睇開Electrolux焗爐，發現佢的電磁爐都唔錯，全在德國製造，闊700mm，跟抽油煙機剛好配合。EIH7000

電熱水爐
去Towngas查詢後知道唔可以換超薄恆溫，又查到上手留低的恆溫爐只用了一年多滿新的，咁就決定唔換新，繼續用舊爐，遲點再作打算。

微波爐
想買的冇貨，要另揀一隻，心目中都係P記NN-GD371M

酒櫃
Open kitchen已經放不下更多的電器，呢個酒櫃俾裝修公司ban了，惟有暫時擱置，搬完後再作打算。

最終加加減減後，跟最初的電器budget差不多。

Project U - Day 6 電工進場

2012年10月13日

今日電工師傅進場，開始重做全屋電線及搬遷電箱，因為電器多多，最終數了35個電掣位，有啲係孖蘇有啲係燈曲，孖蘇＆燈曲計1.5個，每個$500大元，連埋換電箱計計埋冇$25,000都埋唔到單。

 梳化背一個單插再加後置喇叭線出口。

 電視牆

 鋼琴位－寬頻＆電話線的梗位

 主人房冷氣改用窗口式分體

 浴室-上面孖蘇，下面單插洗衣機用

 廚房，仍然好混亂

 廚房左邊孖蘇，一個俾微波爐，另一個其他小電器用，窗邊新造單插又係俾小電器用。

  大門一個係燈掣，一個係視像門鈴用，鞋櫃櫃面一個單插。

另用幾百蚊去買了一個照明工程系統，用門口一個大掣去點著客飯廳燈槽的6組燈，再用遙控控制6組燈的開關，咁做已經省了幾個燈掣，節省了幾千元。效果如何要整完才知道，完成後再出post。

新造或改移電掣入喉藏牆：每個HK$500

燈掣：由開關掣至燈位算一個
曲架掣：計1.5個
孖蘇：計1.5個；其餘蘇位計一個

不過見電工師傅唔係用工具界坑，令到坑位損傷範圍大，有點無奈。

今星期我都交了幾樣功課：
(1) 上星期二訂了磚
(2) 今日訂了潔具
(3) 今日訂了所有電器(除燈飾及抽油煙機外)
(4) 今日辦妥管理費銀行轉帳及其他(一個早上跑了4家銀行)

新玩具 - Window Farm

2012年10月13日

試過在家種香草，不過係我疏於照顧下死曬，一直搵緊啲懶人種植方法，一日睇報紙睇到呢個種植方法，http://hk.apple.nextmedia.com/supplement/culture/art/20120528/16373031，蠢蠢欲動想試試。

繼而上了此種植方法的源頭，美國的網址http://our.windowfarms.org/，佢地有教如何DIY整個system出來，一直未有時間整，係9月只在美國限量生產及發售的window farm system開賣，好心動，不過只接受美國本土的訂單，最終搵代購出手才買得到。

買了兩套，星期六Fedex快遞到家，收到時個盒散散地，原來裡裡外外都給香港海關搜過一遍，我諗香港海關唔知呢套野係乜東東，會奇怪幾個花盤點解要勞師動眾由美國運番來。

個樣同上圖好似有出入，不過外貌唔緊要最緊要work，不過我要等到搬完屋才可built up呢套嘢，依家整只會添煩添亂，要忍吓手唔好玩新玩具住。

Project U - Day 5 搭棚

2012年10月12日

今日搭棚，應該開始換鋁窗，不過唔見有鋁窗送來，有師傅係度開工，不過唔知佢地係邊瓣，送了半打水半打清涼茶什麼的俾師傅潤喉。

Project U - Day 4

2012年10月11日

因為煤氣問題未完全解決，今日都冇乜進度。

問題天天多，今日解決了幾個問題，將想買電器的安裝圖交俾裝修公司，佢地見到咁多玩具頭都大埋，拋出幾個問題：

(1) 廚房去水地台，因為焗爐需要做散熱，如果做石屎去水地台，就會冇咗個散熱用的入氣位，二揀一之下，放棄石屎去水地台，不過就要加地磚。

(2) 一邊曲呎位安裝抽油煙機，因抽油煙機深度有600mm，與另一邊吊櫃門開門時相撞，要諗解決方法，我提出安裝上翻平移門鉸，裝修公司話Blum隻鉸好貴，同埋推出的空位只有6"，我話我去搵隻啱用的，轉頭走上淘寶摷，俾我搵到隻百幾蚊人仔的鉸，Blum係大陸都有得賣不過賣過千。

(3) 煤氣師傅已經報價，不過對我的要求有保留，佢認為由現時的右下角入屋位，搬去左上角太aggressive，咁我可以退一步將煤氣錶由右下角搬去左下角，希望師傅ok，可以盡快開工。

(4) 裝修公司comment話昇盤下面要裝2套來去水，一套昇盤用，一套洗碗碟機用，再加上濾水器，佢擔心冇咁多位置，而且個廚櫃下面已經好多嘢，個死角位可唔可以善用都有問題，我暫時不理，殺到埋身再算。

(5) 其餘係電掣擺位的小問題，不過最驚漏掣位，漏咗就冇得救，又唔可以亂加，一個盛惠$500，仲未計掣面。

Project U - Day 3

2012年10月10日

今日冇進度，個場跟昨天一樣，泥水／電工師傅均未開工，已經貼了通告星期五開始搭棚。

煤氣師傅上門睇過話do-able，要等報價，希望唔係天價，好驚over-budget！

今天休息一天，希望明天有新進展。

Project U - Day 2 清理現場

2012年10月9日

已經獨居了幾年，對自己的生活習慣模式亦很清楚，今次換屋想將舊屋不滿意的地方，在新屋得以完善，雖然只有3個地方想改善，但一啲都唔簡單，唔係全部都可以做到。

1) 浴缸　
浸浴係一種享受，舊居用企缸，無法在家做spa，所以新屋一定要個浴缸。本來想在浴室安個日式小浸浴缸另加企缸，但咁做需要將坐廁向左移一呎，技術上有困難被裝修公司ban了，現時只會有浴缸。唔係最理想，不過點都比以前好。

2) Built-in oven & dishwasher
廚房係另一個改善重點，舊居廚房太小，大一點的家電都放不下，新居的廚房依然好袖珍，所以改做開放式，以增加空間，想將我想擁有的玩具全放入去，想要的玩具有：大雪櫃、焗爐及洗碗碟機。

廚房的改善工程困難重重，曲呎型的廚房只有2像個位置可以安放焗爐及洗碗碟機，而其中一個位置被煤氣錶佔去，所以一直在想辦法移走煤氣錶。初步有4個方案(a) 搬遷現時在外牆的煤氣喉入屋位置，同時將煤氣錶移去角落位；(b)外牆的煤氣喉入屋位置不變，只將在室內的煤氣錶移去角落位，而地櫃造深2吋；(c)改用即熱式電熱水爐(因為係open kitchen所要用無火煮食，全屋只剩浴室用煤氣)；(d)焗爐放在新造的吧枱下，吧枱深24吋，大門做窄3吋。

方案(c)因為屋苑無提供三相電而被ban；方案(b)因為裝修公司唔肯做26吋深的地櫃而被ban； 方案(d) 如果吧枱深24吋，就會令大門不可以開到90º，惟有做窄大門配合，裝修公司唔接受又被ban；方案(a)要搵外面有牌的煤氣師傅做，裝修公司話安排搵人及報價，不過到現在仍未有消息。

所以廚房的改善工程，最終是否能如願仍是未知數。

3) 要有番張飯枱，因為鋼琴佔去舊屋飯枱的位置，當時寧要鋼琴不要飯枱，沒有飯枱對我的生活沒有影響，只是有時家人朋友上來沒有飯枱開飯，今次有番個飯廳，等親戚朋友來可以有個舒服的位置開餐。

話咁快用了2日就拆好屋兼清埋個場。

泥水已經進場。

 所有電線跟喉管要重新造，大工程＄＄＄

 浴室會擴大，放得下浴缸及洗衣機。

重新安排呢堆水電煤係最煩的一項，廚房係集重兵的地方，水電煤的源頭。

Project U - Day 1 拆屋

2012年10月8日

第一天係拆屋，基本上在屋裡面的牆無一幸免，每幅都有改動。cfu們好勁，一天就拆完牆起埋地磚和牆磚。

 廚房造open kitchen，電箱要搬位。

 主人房跟客廳的分隔牆消失，重新分配大小。

 擴大浴室空間，爆爆爆。

遍地瓦礫，玻璃都爆埋？？？
拆屋費用：HK$11,800

Project U - 開工大吉

2012年10月7日

前天收樓，攪好所有水、電、煤、管理費、差餉等的轉名，再去管理處入紙申請裝修，明天cfu開工，希望一切順順利利。

給cfu的小小心意

整個Project係由下面大大小小數10個決定組成，在cfu開工前基本上要決定所有事情，就算details未落實，點都要有個初步出來等cfu可以開工，如果cfu追問先去解決，對Project一定有影響，急忙的決定結果多數不理想，之前做好準備實在太重要。

1)門鈴：款式、接駁／使用方法、價錢

2)門鎖：款式、價錢

3)大門及房門：款式、size、顏色、價錢

4)鋁窗：款式、用料、特別要求、價錢

5)廚櫃：款式、用料、顏色、價錢

6)油漆：顏色、價錢

7)燈掣：款式、顏色、價錢

8)燈飾：款式、顏色、價錢

9)電器:雪櫃，抽油煙機，煮食爐，焗爐，洗碗碟機，微波爐，冷氣機，熱水爐，熱毛巾器，10)抽氣扇，洗衣機：牌子、功能、size、價錢

11)水龍頭：款式、價錢

12)昇盤：款式、價錢

13)拉籃：款式、價錢

14)掛架：款式、價錢

15)電線舖設：需要、價錢

16)寬頻：需要、價錢

17)影音：需要、價錢

18)鞋櫃：款式、顏色、價錢

19)餐枱：款式、顏色、價錢

20)餐椅：款式、顏色、價錢

21)沙發：款式、顏色、價錢

22)電視櫃：款式、顏色、價錢

23)浴缸：牌子、款式、size、價錢

24)洗手盤：牌子、款式、size、價錢

25)坐廁：牌子、款式、size、價錢

26)浴室櫃：款式、用料、價錢

27)窗簾：款式、顏色、價錢

28)床頭櫃：款式、顏色、價錢

29)磁磚(地、浴室、廚房)：款式、顏色、價錢

30)濾水器：功能、款式、價錢

31)垃圾筒：款式、價錢

以上尚未計入一些基建的考慮，由買樓至收樓45天內，每個項目先上網做research，比較優劣，再揀啱budget的，然後再去現場睇實物，唔ok的話又再從頭search過。過程一點都不簡單，加上裝修期約2個半月，即是用4個月的辛勞去換取往後8-10年的安樂窩，現在的辛苦是值得付出的。

Project U - 餐枱椅，初步構思

2012年10月6日

去灣仔睇料，順路去Aluminixx睇餐椅，有三樣家俬想去該店購置：餐椅、tea table、地毯。

餐枱想用原木色的簡約款。呢張係其中一張，不過未睇過實物，要睇過觸摸過先可以決定。

餐椅已經有一張白色Panton Chair，買多3張凳就可以，不過我唔想買番Panton Chair，外面實在有太多漂亮的designer chairs，我承認我係貪心，想擁有不同的designer chair，所以會買不同的designer chair，以不同的designer chair互相搭配，希望做到不同之中，又可和諧共融的餐椅組合。

心目中有Philippe Starck的Master Chair，今年的best buy，簡單漂亮的解構主義，又平宜。

另外一張，Victoria Ghost

或者Louis Ghost

去完Aluminxx跟店員討論過後，店員不推薦Victoria & Louis Ghost。
而推薦了以下4張給考慮：
(1) Tip Ton Chair (Vitra)

(2) Series 7

(3) Chair One

(4) Vegetal Chair

睇完介紹後，心中已有初步諗法，我自已想在虛實之中取平衡，Panton Chair & Series 7係實，Master Chair & Vegetal Chair係虛。取色方面暫時尚未有定案：Panton Chair 白色，其餘3張點樣去搭配，費煞思量，先除掉黑色跟紅色，再在剩下的顏色中再挑選。

同個Salesperson傾得幾開心，同埋唔會hard sell，佢叫我唔好一次過買3張，買住一張回家睇吓配搭出來的效果，再決定其餘的，呢個idea幾好，有時急於下一個決定，結果未必會滿意，逐張買，等我諗清楚有心水才買。如果有朋友來惟有用摺凳頂住，反正人多的話，4張餐椅買齊都唔會夠坐。