2012年4月21日 煮飯週記

2012年4月21日

呢排天氣唔好成日落雨，攪到個人都悶悶不樂，懶洋洋的唔想做家務。晚飯都係事事旦旦又一餐。不過通常事事旦旦整既，都會係高熱量肥死人既dishes。

星期一：芝士汁豬頸肉撈丁

星期三：蟹肉蛋餅&粟米薯蓉

食譜主要跟大少奶，不過我怕蟹餅會散開，最後加上蛋漿改為蟹肉蛋餅，用LC可明火燒的圓形stoneware整，呢隻可以明火燒的stoneware買咗好多年，現在好似已經停產，依家啲stoneware主要係泰國跟中國製造全部都唔可以用明火，呢件made in France可明火燒的stoneware變得好珍貴。

又係簡簡單單的整了粟米薯蓉，果醬伴蟹餅，都幾好味。

星期四：Ikea肉丸併新薯

Ikea隻肉丸好抵食，一包HK$79有1kg重，一粒肉丸標準重量係15g，即係一包有成60+粒，而家啲豬肉咁貴，自己整都唔會便宜好多，最重要係好味，買現成既好過自己費功夫。幾粒新薯再加啲果醬就係A貨Ikea瑞典肉丸dish。

星期五：常餐－豬骨湯麵，有時搭廣島蠔，呢排搭帆立貝。

星期日：Pizza，用P仔打麵糰，打一次可以整4個細Pizza，今次先焗個Pizza餅底，後再加topping再焗，未用的Pizza餅底放入冰箱，用時才拎出來解凍及加topping，方便好多。

【包餅工房】P仔 - Cuoca黑芝麻芝士麵包

2012年4月16日

冇晒包包做早餐，最近天氣超潮濕，包包既水份好難控制，多水包包會發唔起變做小矮人，甚至因為水份太重令到包面下陷，差距只係5-10ml既水份都可以令成品失敗。

今日都係多水，已經減了10ml水份都係濕，將麵糰拎出來包入芝士粒時，麵糰好黏手。

星期日去二記入貨，買了車輪包麵包箱&方包麵包箱，仲有竹灰粉，依家材料工具齊全，夾到時間就可以開工整panda bread，另外買了Anchor高溶點芝士，今日都有放入包包內，爐完出來仲係一粒粒冇溶化，味道OK。

記錄番今日包包既資料先：cuoca黑芝麻包預拌粉，扣起10ml水份，用4小時軟吐司mode，出來包包都係因為潮濕發唔起（已經有開冷氣降低濕度），只有14.5cm高，不過一樣軟熟，烘焙之前約1.5小時前手動包入高溶點芝士，放回麵包機時拎起攪拌葉，芝士冇再經過攪拌，出來係原粒大小沒有溶化。

晚上7:07開機；11:07出爐。

【包餅工房】P仔 - Cuoca士多啤梨麵包

2012年4月15日

呢排係麵包機主場，用預約模式4小時吐司mode，水份減10ml，出來淡淡粉紅色好靚，不過呢個係送俾侄女的包包，味道好唔好就要問佢至知。

送俾侄女既仲有呢袋絕無添加劑的愛心包包。

【包餅工房】P仔 - 生煎包

2012年4月14日

整完造型包，仲係意猶未盡，用P仔揉麵糰做生煎包的外皮。超鍾意食上海小楊生煎，每次去上海必食。我仲傻到試過買生煎包返屋企，拆開隻生煎包，用磅磅吓個皮有幾重，個餡又有幾重。

今日用煎餃外皮既食譜，用P仔揉麵，揉好後再靜置30分鐘。豬肉絞碎後加些小水令包包有肉汁。

原來生煎包係好難好難包，係youtube又搵唔到清晰既教學，自己惟有硬住頭皮亂包一通。出來的成品，個皮太厚同質感跟小楊差太遠，小楊的皮比較鬆軟及甜，所以個皮應該有加酵母跟糖。不過包包內餡算是有小小肉汁。

呢個包生煎包的技巧，相信要拜師學藝先至攪得掂。

【包餅工房】P仔 - 第一次造型包

2012年4月14日

P仔除了用來整方包外，仲有好多function，如果想做造型包就可單選揉麵糰的function，可幫你將材料搓好同做埋第一次發酵（總共需要1小時)。

麵糰由機內取出，先將麵糰平均分割成12等份，揉成圓形靜置10分鐘。

之後就包上餡料，今日有4種口味，分別是朱古力流心、芝士火腿、腸仔、肉鬆。

包上餡料後就開始第二次發酵，30℃大約需時30分鐘，雖然今日好熱但未去到30℃，發酵時間就要加長，總之包包有2倍大及手指篤入麵糰後不回彈，就算完成發酵。

入爐前在包面塗上蛋汁及加上topping，加上不同topping幫我分辨不同的包包，黑芝麻topping是肉鬆包，朱古力粒是朱古力流心包，咸包梗係要加芝士係包面增加風味。

可能因為我的焗爐有熱風，所以包面被吹到較乾身，唔似外面買的包面係軟身的，下次要研究點樣去改善。

四種口味都鍾意，細細個容易食，好容易o趙吓一個o趙吓又一個。

【包餅工房】P仔 - 合桃香蕉蛋糕

2012年4月11日

P仔可以用來整楓糖合桃香蕉麵包，亦可以整合桃香蕉蛋糕，昨天剩下2隻超熟蕉，再不用就爛掉，冇理由再整麵包，不如用來整蛋糕，雖然蛋糕好肥，不過真係好好味，用跟機的南瓜食譜，將100g南瓜的份量改為香蕉，其他材料份量照跟。開始烘焙時打開機頂蓋，手動將烘香的合桃放在蛋糕面。

焗蛋糕快過整麵包，用個半鐘就攪掂。

用P仔整蛋糕既好處係乾手淨腳，整完只係需要洗乾淨個麵包箱就ok，將P仔麵包箱放係電子磅上，按份量將材料放入麵包箱，唔洗好似以前咁，做一個蛋糕要預備好多大小碗，一種材料一個碗，再加上打蛋器、刮刀等一大堆工具，蛋糕入爐後仲要花時間清理。依家將麵包箱放入麵包機後就可以坐定定等香噴噴既蛋糕出爐，超讚。

【包餅工房】P仔 - 楓糖合桃香蕉麵包

2012年4月10日

早兩個星期bk班 jm齊齊整楓糖香蕉麵包，我買唔到半熟蕉去湊熱鬧，早幾日買了梳蕉，尋晚終於等到佢有十成熟可以做蕉包。食譜跟bk上 jm share出來的食譜。

我用function2，4小時50分鐘的軟吐司程式，用泰粉，預較早上8:20am出爐，合桃用焗爐烘5分鐘再放入乾果格粗混模式，今次都係第一次用乾果格加料。尋晚濕度有90%+，扣起10ml水份，出來都係得14cm高，合桃放滿乾果格都唔算有好多合桃。

不過出來個光頭仔都幾靚。

啲香蕉已經熟到成間屋都係香蕉味，但焗時又冇乜香蕉味，同埋楓糖又係，包包好軟熟，但食落唔係好有楓糖味，會唔會因為呢隻係organic糖漿，唔似普通的糖漿有好多添加劑去增加香氣和味道?

【包餅工房】P仔 - 火腿芝士包(2)

2012年4月9日

今日又再整包，呢個係Judy早一天order的包包，佢喜歡咸包，今日濕度高，個麵糰好濕，做呢個包秘訣係要將火腿跟芝士捲得夠實。

切出來有好多窿窿，明明已經捲得好實！？好彩Judy唔厭棄。

2012 復活節 - 大食篇

2012年4月9日

4天的復活節假期，霎眼就過去，明天又要回到繁忙既工作崗位。呢幾日日日都係度整嘢食，不過個雪櫃卻越清越多，依家仍然係迫到爆咁滯。

Day 1 (6/Apr) - 先來個豐富既早餐

午餐食紫菜包飯

餡料有蛋、腸仔、蟹柳、醃蘿蔔、肉鬆，好豐富。晚餐skip。

Day 2 (7/Apr) - 紫米露做午餐，忙著整麵包，晚餐係麵包加手打粟米忌廉湯，用鮮粟米拆粒加水煮沸，再用hand-held blender打成湯後再加忌廉。

Day 3 (8/Apr) - 一早出街買餸預備今晚既晚餐，冇食早餐，午餐係麵包&豆奶。

今晚既晚餐，原來既菜單係：菜膽砂鍋雲吞雞、蒸蟶子、砵酒蠔、灼菜、白飯。後來買了蟹肉，諗住跟大少奶的食譜整蟹餅，就cancel了砵酒蠔，又臨場個細爐頭壞了，剩返一個爐頭用來煲飯，只得再cancel蟹餅，幸好來賓驚死餓親，買了盤壽司，最終今日既晚餐算順利完成。

時間上既掌握仍需努力，海鮮早了出，雞湯又遲了半個鐘先煮好，攪到手忙腳亂。不過今次烹調既安排算ok，用我呢個蚊型廚房又冇飯煲，係可以整到三餸一湯白飯任裝。

(1) 用高速煲整砂鍋雲吞雞既雞湯湯底(湯底用半個日本旺菜、一只雞&金華火腿; 雞件和火腿要先用薑蔥汆去血水及雪藏味)；

(2) 用微波焗爐蒸海鮮（蟶子跟扇貝係在Market Place現買的海鮮，處理好仲有埋調味，換隻碟拎去蒸就得）；

(3) 用LC 14cm煲明火煮飯(用LC煮飯快過飯煲，下米&水，水滾後轉細火煮10-12分鐘，熄火後再焗15分鐘就ok)；

(4) 用LC 18cm煲灼菜膽跟雲吞，煮好後跟加上雞湯湯底，呢個菜最複雜，功夫多，不過好好味，一粒塩都唔需要落都好夠味；

(5) 後再用LC 18cm煲灼唐生菜；

(6) 如果唔係其中一個爐頭突然壞了，係仲可以整多一味餸。

既然Rachel Khoo都可以用蚊型廚房(The Little Paris Kitchen)做法國私房菜，我用同樣既蚊型廚房整三餸一湯冇乜唔得。而且難度可能更高，西餐只有一道主菜，而中菜就要幾道菜一齊出。如果再有下次都係揀整西餐，買幾塊靚扒加個LC grill pan就可輕鬆攪掂。

今次係我咁大個人第一次處理一隻有頭有尾既死雞，我對用菜刀斬肉有恐懼，只係識用把廚剪，用一把廚剪剪走個雞頭連頸，有夠恐怖的，怕還怕，最後死頂用把廚剪將隻雞大卸八塊。呢啲劏雞經驗，最好都係冇下次。

Day 4 (9/Apr) - 昨天辛苦了一天，早餐要慰勞一下自己，彩繪蛋卷做早餐（有半條已經送了俾侄女）。下午去Megabox食小南國。

晚餐用隔了幾夜的义燒整廈門炒米。

同場加映煎釀青椒

【包餅工房】P仔 - 大理石麵包

2012年4月8日

失敗乃成功之母，昨日整大理石麵包失敗，今日再接再厲終於成功。關鍵係嚿軟朱古力，食譜書冇教點整件軟朱古力，只係講軟朱古力重150g。昨日用100g一排既瑞士蓮朱古力加50g奶，用熱水座溶朱古力後，整成四方型，擺入雪櫃。

點知朱古力唔夠凍，加上麵糰本身有熱度，軟朱古力包入麵糰後溶化成漿，用擀麵棍轆轆吓爆漿，最終失敗收場，將爆漿包包掉番入麵包桶繼續烘焙，出來樣子古怪，幸好味道好好。

反正買了2排朱古力，今日再試過，昨晚將100g朱古力加20g牛奶用同一方法整成軟朱古力片，今次放入冰箱冷藏一晚。

因為呢塊軟朱古力夠凍，所以今次冇溶化爆漿，不過整呢個一定要手快，同埋如果天氣熱就一定要開住冷氣整。

出來的成品雖然不算高大，但好滿意，同食譜書個demo有8分似。