【包餅工房】P仔 - 合桃香蕉蛋糕

2012年4月11日

P仔可以用來整楓糖合桃香蕉麵包，亦可以整合桃香蕉蛋糕，昨天剩下2隻超熟蕉，再不用就爛掉，冇理由再整麵包，不如用來整蛋糕，雖然蛋糕好肥，不過真係好好味，用跟機的南瓜食譜，將100g南瓜的份量改為香蕉，其他材料份量照跟。開始烘焙時打開機頂蓋，手動將烘香的合桃放在蛋糕面。

焗蛋糕快過整麵包，用個半鐘就攪掂。

用P仔整蛋糕既好處係乾手淨腳，整完只係需要洗乾淨個麵包箱就ok，將P仔麵包箱放係電子磅上，按份量將材料放入麵包箱，唔洗好似以前咁，做一個蛋糕要預備好多大小碗，一種材料一個碗，再加上打蛋器、刮刀等一大堆工具，蛋糕入爐後仲要花時間清理。依家將麵包箱放入麵包機後就可以坐定定等香噴噴既蛋糕出爐，超讚。

【包餅工房】P仔 - 楓糖合桃香蕉麵包

2012年4月10日

早兩個星期bk班 jm齊齊整楓糖香蕉麵包，我買唔到半熟蕉去湊熱鬧，早幾日買了梳蕉，尋晚終於等到佢有十成熟可以做蕉包。食譜跟bk上 jm share出來的食譜。

我用function2，4小時50分鐘的軟吐司程式，用泰粉，預較早上8:20am出爐，合桃用焗爐烘5分鐘再放入乾果格粗混模式，今次都係第一次用乾果格加料。尋晚濕度有90%+，扣起10ml水份，出來都係得14cm高，合桃放滿乾果格都唔算有好多合桃。

不過出來個光頭仔都幾靚。

啲香蕉已經熟到成間屋都係香蕉味，但焗時又冇乜香蕉味，同埋楓糖又係，包包好軟熟，但食落唔係好有楓糖味，會唔會因為呢隻係organic糖漿，唔似普通的糖漿有好多添加劑去增加香氣和味道?

【包餅工房】P仔 - 火腿芝士包(2)

2012年4月9日

今日又再整包，呢個係Judy早一天order的包包，佢喜歡咸包，今日濕度高，個麵糰好濕，做呢個包秘訣係要將火腿跟芝士捲得夠實。

切出來有好多窿窿，明明已經捲得好實！？好彩Judy唔厭棄。

2012 復活節 - 大食篇

2012年4月9日

4天的復活節假期，霎眼就過去，明天又要回到繁忙既工作崗位。呢幾日日日都係度整嘢食，不過個雪櫃卻越清越多，依家仍然係迫到爆咁滯。

Day 1 (6/Apr) - 先來個豐富既早餐

午餐食紫菜包飯

餡料有蛋、腸仔、蟹柳、醃蘿蔔、肉鬆，好豐富。晚餐skip。

Day 2 (7/Apr) - 紫米露做午餐，忙著整麵包，晚餐係麵包加手打粟米忌廉湯，用鮮粟米拆粒加水煮沸，再用hand-held blender打成湯後再加忌廉。

Day 3 (8/Apr) - 一早出街買餸預備今晚既晚餐，冇食早餐，午餐係麵包&豆奶。

今晚既晚餐，原來既菜單係：菜膽砂鍋雲吞雞、蒸蟶子、砵酒蠔、灼菜、白飯。後來買了蟹肉，諗住跟大少奶的食譜整蟹餅，就cancel了砵酒蠔，又臨場個細爐頭壞了，剩返一個爐頭用來煲飯，只得再cancel蟹餅，幸好來賓驚死餓親，買了盤壽司，最終今日既晚餐算順利完成。

時間上既掌握仍需努力，海鮮早了出，雞湯又遲了半個鐘先煮好，攪到手忙腳亂。不過今次烹調既安排算ok，用我呢個蚊型廚房又冇飯煲，係可以整到三餸一湯白飯任裝。

(1) 用高速煲整砂鍋雲吞雞既雞湯湯底(湯底用半個日本旺菜、一只雞&金華火腿; 雞件和火腿要先用薑蔥汆去血水及雪藏味)；

(2) 用微波焗爐蒸海鮮（蟶子跟扇貝係在Market Place現買的海鮮，處理好仲有埋調味，換隻碟拎去蒸就得）；

(3) 用LC 14cm煲明火煮飯(用LC煮飯快過飯煲，下米&水，水滾後轉細火煮10-12分鐘，熄火後再焗15分鐘就ok)；

(4) 用LC 18cm煲灼菜膽跟雲吞，煮好後跟加上雞湯湯底，呢個菜最複雜，功夫多，不過好好味，一粒塩都唔需要落都好夠味；

(5) 後再用LC 18cm煲灼唐生菜；

(6) 如果唔係其中一個爐頭突然壞了，係仲可以整多一味餸。

既然Rachel Khoo都可以用蚊型廚房(The Little Paris Kitchen)做法國私房菜，我用同樣既蚊型廚房整三餸一湯冇乜唔得。而且難度可能更高，西餐只有一道主菜，而中菜就要幾道菜一齊出。如果再有下次都係揀整西餐，買幾塊靚扒加個LC grill pan就可輕鬆攪掂。

今次係我咁大個人第一次處理一隻有頭有尾既死雞，我對用菜刀斬肉有恐懼，只係識用把廚剪，用一把廚剪剪走個雞頭連頸，有夠恐怖的，怕還怕，最後死頂用把廚剪將隻雞大卸八塊。呢啲劏雞經驗，最好都係冇下次。

Day 4 (9/Apr) - 昨天辛苦了一天，早餐要慰勞一下自己，彩繪蛋卷做早餐（有半條已經送了俾侄女）。下午去Megabox食小南國。

晚餐用隔了幾夜的义燒整廈門炒米。

同場加映煎釀青椒

【包餅工房】P仔 - 大理石麵包

2012年4月8日

失敗乃成功之母，昨日整大理石麵包失敗，今日再接再厲終於成功。關鍵係嚿軟朱古力，食譜書冇教點整件軟朱古力，只係講軟朱古力重150g。昨日用100g一排既瑞士蓮朱古力加50g奶，用熱水座溶朱古力後，整成四方型，擺入雪櫃。

點知朱古力唔夠凍，加上麵糰本身有熱度，軟朱古力包入麵糰後溶化成漿，用擀麵棍轆轆吓爆漿，最終失敗收場，將爆漿包包掉番入麵包桶繼續烘焙，出來樣子古怪，幸好味道好好。

反正買了2排朱古力，今日再試過，昨晚將100g朱古力加20g牛奶用同一方法整成軟朱古力片，今次放入冰箱冷藏一晚。

因為呢塊軟朱古力夠凍，所以今次冇溶化爆漿，不過整呢個一定要手快，同埋如果天氣熱就一定要開住冷氣整。

出來的成品雖然不算高大，但好滿意，同食譜書個demo有8分似。

【包餅工房】彩繪蛋卷

2012年4月7日

今早大理石包失敗，弱小心靈受創，試另一樣轉移情緒。先前大家姐送了呢本書俾我，今日就跟住整。

先整好心心圖案，第一次用食用顏料，份量掌握得唔好，深淺粉紅兩隻色的色差唔夠明顯。

心心焗過龍，睇錯instruction，應該只需1-2分鐘，我足足焗了14分鐘，心心顏色都變黑了，而且影響到蛋糕體同心心既黏合。

蛋糕片放上香蕉、士多啤梨、奇異果 & cream，卷好後放入雪櫃，雪至cream變硬就可以切開來食。

卷出來個樣都算ok，因為第一次整，畫心心花了好多時間，連事後清潔足足用了3個小時製作，呢個真係要有心情跟時間先可以整既玩意。難度唔高，只係花時間。

昨晚整得咁辛苦，早上享受成果同嘆番杯咖啡先。

再戰-蜜汁义燒

2012年4月4日

之前整過兩三次蜜汁义燒，都係失敗收場，失敗有各種原因：塊肉太薄燒得太燶、醃過頭味道太咸、個食譜的調味唔得等，擒日晨早去超市同肉檔嬸嬸買整义燒的豬梅頭肉，嬸嬸推介了2嚿合共一斤多小小。

今日跟Rachel Yau食譜整，醃40分鐘後放入預熱200℃的焗爐燒25分鐘，然後掃上加了水及用熱水坐溶的麥芽糖糖水，然後將爐溫降至180℃再燒40分鐘，中途再上2次糖水同番轉。Rachel Yau掃上肉的塗料比較複雜，我將佢簡化成只上麥芽糖糖水。今次嚿肉夠厚，燒得好靚，邊邊有小小焦，切出來都好得，唔太乾，大成功JJJ。

不過要花心機去睇火，Pansonic呢個微波焗爐用了差不多3年我仍未摸透佢既個性，要同佢多花時間培養感情至得，以前家裡的土豆牌焗爐既簡單又好用，越hi-tech越難攪。

2012年4月4日 日記

2012年4月4日

放假比返工更忙，上午10:00出發去中環豚王食個early lunch，後去Nespresso補充存貨，再逛“叔婆”買好料，下午14:00到家。回家後用P仔整麵包，醃豬頸肉，同再戰蜜汁义燒，由晏晝忙到傍晚。

早到咗，四處逛下先，假日既中環好寧靜。

豚王11點開舖，早10分鐘到達，前面已經有20+人排隊，不過好好彩，攝到單丁位，第一輪就入到去食。

豚王拉麵好好味，尤其係日式义燒，雖然切到好薄不過塊肉真係好滑嫩，另外加HK$15既溫泉蛋，又係必食，切開隻蛋真係啱啱好。

去開中環就梗係順便去Nespresso入貨，過時過節Nespresso都會出一啲limited edition，呢個Easter推出Naora，咖啡強度係中等強的5度，入口有blackcurrent & blueberry味，如果加奶就會有walnut & hazelnut味，係舖頭試飲後，買了2條返家慢慢嗒真啲。

依家去“叔婆”都係走粉多，前排鍾意買啲古靈精怪的調味，呢排麵包機大熱，梗係買同麵包機有關的東西。今次買咗：北海道產高粉、手打烏冬粉、芝士、急凍藍莓、墨魚汁（用麵包機整意大利墨魚麵）同意大利番茄乾。

今日本來想整千層朱古力包，因為整唔切塊朱古力餡，惟有事事旦旦用食剩的朱古力粒粒包餡，出來味道OK，不過賣相FAIL，而且攪到包包發育不良得13cm。今次仍然係用泰粉，4小時吐司mode。

晚餐係豬頸肉青菜沙律，跟Rachel Yau的食譜，味道不過不失略為偏咸，下次會試其他食譜。

Hong Kong 迪迪尼

2012年4月3日

晨早整個侄女至鍾意既馬拉糕俾佢做下午茶，仲有唔少得既Kinder出奇蛋同笑牛牌芝士。本來承諾送個公主蛋糕俾佢，因為外婆係中山病重，父母去咗探望，生日會要延期。

今日係侄女4歲生日，我受邀入迪迪尼同佢玩番日。去過美國Florida同日本迪迪尼，香港的真係細得可憐，但係人又多，處處都要排隊排餐死，等就要一粒鐘，玩就只有一分鐘！

今日中午入到去，睇完煙花出番來，玩了小飛象、米奇幻想曲、轉轉彈弓狗、旋轉木馬、馳車天地；跟Jessie & Buzz Lightyear合照，就係咁多。

因為要排隊，就算個樂園咁細都冇可能一天內玩晒，只可能挑一些小朋友鍾意的去玩。

晚餐係侄女選的元氣壽司，又熱又曬玩咗成日晚上10:00到家成個人散晒，不過小朋友開心，happy最重要。

帶子青菜沙律

2012年4月2日

天氣越來越熱，著衫越來越薄，冬天積存的豬腩肉好快現形，要出清豬腩肉先從食入手，呢排麵包機大熱，早餐食好多carbohydrate，呢個好難減，惟有係晚餐下手，今晚帶子青菜沙律跟味噌湯。

呢個沙律汁好好味，不過都係高熱量。