番茄牛肉麵

2011年5月28日

第一次去因為不知道星期日是休息日結果摸門釘，最後行了去新記食招牌菜：豬頸肉芝士撈丁加凍奶茶。豬頸肉幾香口邊邊有少少焦，但其實豬頸肉好易整，冇乜難度，芝士撈丁:芝士味一般唔算好濃烈，小小一份豬頸肉芝士撈丁盛惠HK$37小貴，星期日又冇套餐，飲品要散叫，午餐要成HK$50仲係唔算食得飽，性價比超低。

幾個星期後再去尖沙咀，終於可以一試星座冰室的招牌菜：番茄牛肉麵(HK$24)，冇期望中的好味道，唔鍾意糊狀的湯底，唔明落咁多生粉整個咁杰既湯底有什麼好處，番茄唔算鮮甜，牛肉又係一般。不過價錢比豬頸肉芝士撈丁平好多，加埋汽水合共HK$33。係尖沙咀食午餐呢個價錢算OK。

下次還是飛快回牛頭角的北記食我至愛的豬扒雞翼通加支裝忌廉，才HK$26。

新世界韓式食品

2011年5月14日


每次出開尖沙咀都想去新世界入貨，不過佢的營業時間實在太難遷就，很多時候都是望門輕嘆。

今日買了大辣泡菜、醃辣魷魚、醃辣雞泡魚。雞泡魚腥味較重，其餘都好好味。另外，當然是好味的韓式紫菜包飯（日本人叫壽司；韓國人叫紫菜包飯）。

營業時間：星期一至六 10:00 - 21:00; 星期日休息

青口+橄欖油蒜味意粉

2011年5月10日

【敗家誌】Balanciaga Classic City Bag

2011年5月10日

買過唔少袋，平又有貴又有，不過最好用都係呢一隻，我對買手袋有一定的要求：

第一袋口要係拉鏈，唔係成日心驚驚會跌野出來又或者俾人打咗荷包都唔知；

第二係可以手拎又可以單肩揹；

第三當然係袋身要輕巧；

第四款式要簡約又不失現代感－即係款式要需看；

第五最好係用小羊皮，皮質要夠軟熟，牛皮袋好重手又硬。

唔係好多袋可以完全符合上面的５大要求。

呢隻Balanciaga符合以上5項之外，仲有一個優點就是有２個拉鏈頭拉鏈是由中間對開，即是你用左肩揹袋，抑或用右肩，你都可以調節拉鏈頭位置，拉鏈頭幾時都可以係你視線內，安全感大大增加。

Model #115748

Dimensions: 15"W x 9.5"H x 5.5"D

得閒炒飯

2011年5月2日
第一次用自己煮既飯來炒飯, 材料係最基本的雜豆, 雞蛋, 韓國BBQ烤肉, 米係用台灣台梗9號米, 呢隻米特點係比較Q, 每粒米都好飽滿。炒出來後飯是一粒粒, 最後簡單的用了日本醬油上色跟調味。原來炒飯真係好容易。

【敗家誌】Chanel 2.55 Jumbo Gold Chain Lambskin Bag

2011年4月30日

姊姊有朋友去巴黎，搭佢朋友買了隻CHANEL，新袋到手冇耐係6月份CHANEL又加價，再一次驗證“早買早享受，遲買唔止貴幾舊”的說法。名牌手袋比大陸人搶貴曬係不爭的事實，比此更大鑊既係美國繼續印銀紙，令到我們手上的貨幣越來越不值錢，呢個趨勢短時間內唔會有改變，再唔入手只會更後悔。

因此我對呢類奢侈品的態度亦有改變，負擔得起又鍾意的話就出手，不會再考慮太多。

胡志明市 - 3天2夜business trip (day 3)

2011年4月30日

今天是越南4天公眾假期的第一天, 我訂了傍晚7:00的航班回港, 咁唔想打攪當地同事, 得我一個人又想消磨一天, 究竟做乜好? 我諗最好的節目就是做spa, 未去越南之前已經上網做research, 最後預訂了這間spa http://www.lapothiquaire.com/。
早上10點鐘spa centre安排一輛老爺車由酒店接(不包送), 到達前車子先駛進一條道傍均是舖滿綠色植物的小路, 最後停在一座超過100 年的古舊法式建築前, 站在大宅前, 外面繁囂的胡志明市變得很遙遠。此spa在當地屬高檔次, 用的products均是made in France。漂亮的建築物, 乾淨的環境, 寧靜的氣氛, 體貼的service, 好的spa本該如此。

我有充裕的時間, 因此挑了一個5小時的package, 收費連10%VAT只是VND2,420,000, 享受了大半天花費卻不到港幣1,000元, 好便宜哦。之後spa centre幫我call taxi到機場, 車費US$5。如果下次有機會, 一定會再到此嘆世界。
Package包括:
(1) Pick Up Service
(2) Aromatic Fresh Herbs & Essential Oils Steam Sauna
(3) 100% Organic “Detox” Herbal Tea Foot Pressure Treatment
(4) Exfoliation & Body Massage & Treatment
(5) Spa Cuisine - light lunch 包2款越南粉卷及咖啡布丁, lunch是坐在大宅後園泳池傍的樹蔭下享用。
(6) Personalized Facial

胡志明市 - 3天2夜business trip (day 2)

2011年4月29日

返公司前先去賣扎肉的第一大店NHU LAN 買扎肉。買了3種不同的扎肉, 4條1KG; 2條500G, 每KG約VND190,000; US$1大約換VND20,400, 即係一條約US$9。

不過店舖既人唔識講英文, 啲招紙又係越南文, 好彩ACCT MGR陪我去, 因為種類好多, 好易唔知自己買咗乜, 有local人做翻譯方便好多。

另一樣到越南必買的就是Legendee咖啡, 同事一早已幫我買好, 250g一包VND140,000, 係香港買要3倍價錢。今次買埋沖咖啡用的dipping pot。

中午同事帶我去食中等檔次的越南餐館, 比去年好多了, 去年是帶我去酒店食buffet多失敗 。

晚上另一個GM帶我去食飯, 唉還是逃不了酒店的buffet, 之後去咗一間bar聽live band表演, 後回酒店休息, 結束了在胡志明市的一個工作天。

胡志明市 - 3天2夜business trip (day 1)

2011年4月28日

傍晚到達胡志明市, 公司的當地GM跟ACCT MGR問我晚餐想食乜, 去年我任由他們決定, 點知他們帶我去食中國菜!! 因為佢地認為帶客人食牛河太寒酸, 要食得豪啲。但今年我唔客氣講明要食越南牛河。

酒店check-in後就去咗一間完全唔起眼, 但GM話已經出國既local人, 如果返胡志明市都會來這家店食越南牛河。店面2層普通麵店格局。我點了一碗mix beef noodle, 即係乜牛都有, 真係好好味, 牛肉雖不至於入口即融, 但真的很淋及入味, 牛有牛味, 隨湯河一起上既就有一大碟未煮熟既芽菜同不知名既蔬菜, 仲有黑黑的醬料。

飽後回酒店早早休息, 迎接明天的工作。

今年跟去年一樣住在Lengend Hotel, US$150一晚, 胡志明市的高樓好像越來越多。

【敗家誌】Prada Gaufrè Bags

2011年4月23日

隨著Prada在香港上市，為了要向廣大的股民交出業績，意味佢的銷售模式將不可能只focus係一小撮高階客戶，客戶層面需日漸擴大，即產品將會越來越平易近人，由佢開始係中國生產皮具以增加profit margin可見佢已經放棄頂尖品牌全在意大利生產的堅持，對質量作出讓步以圖增加利潤。

越來越多的產品，令人眼花繚亂的同時，未必每款產品均可打入消費者的心，庫存量增加，過季品以不同渠道減價求售，週街都係貨，更令此品牌的鶩貴度大減。預示著此品牌離開CHANEL、HERMÈS等的級數越來越遠。

相信這兩個Prada的經典gaufrè袋可能係我對此品牌的最後支持。