【包餅工房】P仔 - 芝士包encore

2012年4月28日

咸包中最like呢個，呢排好潮濕，為咗避免包包變小矮人，勁減水，跟機食譜水加奶減至160ml，今次用加拿大粉。Mode2 法國軟吐司mode。包包冇變小矮人，又有光頭仔，身高15.5cm。

【包餅工房】失敗的車輪包

2012年4月28日

由尋晚8:00一直瞓，瞓到周身骨痛，起身勞動一下，先用p仔搓好麵糰，完成後拎出來排氣靜置，包入提子乾造型，再放入已預先塗油的車輪模發酵，發酵完用200℃焗10分鐘。

出來一整個失敗，第一：脫模有困難，可能塗油不夠多；第二：明顯焗的時間不夠，我係跟“港麵包港味道”的instruction，後來再追加焗多10分鐘但仍不夠，之後請教bk的jm，說其實要焗25-30分鐘；第三：忘記了下蛋液，顏色& texture都不對。第四：發酵過度，包面有好多大氣孔。最後只能是垃圾桶回收。


對於我呢個新手，唔靠麵包機去整出好味的包包，仍有一段慢長的路要走。同埋病中精神不足真的不宜挑戰新事物，會死的很慘。

【敗家誌】P仔雪糕機

2012年4月27日

由星期二病到今日仲未好，昨夜仲發燒，今日係屋企休息，湊巧上星期在樂天日本訂既Panasonic雪糕機&白神酵母寄到。

P記呢款雪糕機曾經係香港有賣，不過香港代理近年已經冇賣。因為呢個雪糕機容量比一般的雪糕機細，但價錢比一般的貴。

不過佢獨特的地方就係唔需要預先冷凍雪糕盤，一般雪糕機係要將內膽／盤預先放入冰箱冷凍起碼8小時，才可以用來整雪糕，放入材料攪拌完成後，再要將雪糕冷凍幾個鐘先有得食。

P記呢個就省時好多，不需預冷，將材料放入雪糕機，然後整部雪糕機放入冰箱，雪糕機用乾電運作，在冰箱內進行攪拌，只需4小時雪糕就完成，可以食用，係咪好amazing，好方便快捷哦。

仍未病好冇得同雪糕機剪綵，不過都試下擺入冰箱睇下個位fit唔fit先，just make呢。 今個夏天有home-made雪糕食喇。

【包餅工房】P仔 - 芝士包

2012年4月24日

近排由泰國高粉轉用韓國高粉跟加拿大高粉，加上天氣不穩定，近期包包全部變矮仔，因此唔攪咁多花樣住，還原基本步，調較好用韓國高粉及加拿大高粉的水份量再算，今日用跟機白方包食譜。

材料：
90g韓國高粉
160g加拿大高粉
170ml 水加奶
5g 鹽
17g 黃糖
10g 日清菜油
3g 酵母
高溶點芝士 - 放滿乾果格

水份減至170ml，麵糰仍然好濕，後再加10g加拿大高粉&10g日清低粉。出來終於有番個高大靚靚既光頭仔。

高溶點芝士放入乾果格，揀選粗混模式4小時吐司mode，沒有完全被攪碎或溶化，仍然見到粒粒芝士。

【包餅工房】P仔 - 楓糖胚芽方包

2012年4月22日

呢一輪啲包包個個都係小矮人，今日呢個都係只得12cm。
材料：
韓國高粉 220g
小麥胚芽   30g
楓糖漿       20g
日清菜油   20g
鹽                 3g
金馬利酵母 3g
奶                60ml
水              110ml

而且包包唔好味，最後都係益了垃圾桶。

2012年4月21日 煮飯週記

2012年4月21日

呢排天氣唔好成日落雨，攪到個人都悶悶不樂，懶洋洋的唔想做家務。晚飯都係事事旦旦又一餐。不過通常事事旦旦整既，都會係高熱量肥死人既dishes。

星期一：芝士汁豬頸肉撈丁

星期三：蟹肉蛋餅&粟米薯蓉

食譜主要跟大少奶，不過我怕蟹餅會散開，最後加上蛋漿改為蟹肉蛋餅，用LC可明火燒的圓形stoneware整，呢隻可以明火燒的stoneware買咗好多年，現在好似已經停產，依家啲stoneware主要係泰國跟中國製造全部都唔可以用明火，呢件made in France可明火燒的stoneware變得好珍貴。

又係簡簡單單的整了粟米薯蓉，果醬伴蟹餅，都幾好味。

星期四：Ikea肉丸併新薯

Ikea隻肉丸好抵食，一包HK$79有1kg重，一粒肉丸標準重量係15g，即係一包有成60+粒，而家啲豬肉咁貴，自己整都唔會便宜好多，最重要係好味，買現成既好過自己費功夫。幾粒新薯再加啲果醬就係A貨Ikea瑞典肉丸dish。

星期五：常餐－豬骨湯麵，有時搭廣島蠔，呢排搭帆立貝。

星期日：Pizza，用P仔打麵糰，打一次可以整4個細Pizza，今次先焗個Pizza餅底，後再加topping再焗，未用的Pizza餅底放入冰箱，用時才拎出來解凍及加topping，方便好多。

【包餅工房】P仔 - Cuoca黑芝麻芝士麵包

2012年4月16日

冇晒包包做早餐，最近天氣超潮濕，包包既水份好難控制，多水包包會發唔起變做小矮人，甚至因為水份太重令到包面下陷，差距只係5-10ml既水份都可以令成品失敗。

今日都係多水，已經減了10ml水份都係濕，將麵糰拎出來包入芝士粒時，麵糰好黏手。

星期日去二記入貨，買了車輪包麵包箱&方包麵包箱，仲有竹灰粉，依家材料工具齊全，夾到時間就可以開工整panda bread，另外買了Anchor高溶點芝士，今日都有放入包包內，爐完出來仲係一粒粒冇溶化，味道OK。

記錄番今日包包既資料先：cuoca黑芝麻包預拌粉，扣起10ml水份，用4小時軟吐司mode，出來包包都係因為潮濕發唔起（已經有開冷氣降低濕度），只有14.5cm高，不過一樣軟熟，烘焙之前約1.5小時前手動包入高溶點芝士，放回麵包機時拎起攪拌葉，芝士冇再經過攪拌，出來係原粒大小沒有溶化。

晚上7:07開機；11:07出爐。

【包餅工房】P仔 - Cuoca士多啤梨麵包

2012年4月15日

呢排係麵包機主場，用預約模式4小時吐司mode，水份減10ml，出來淡淡粉紅色好靚，不過呢個係送俾侄女的包包，味道好唔好就要問佢至知。

送俾侄女既仲有呢袋絕無添加劑的愛心包包。

【包餅工房】P仔 - 生煎包

2012年4月14日

整完造型包，仲係意猶未盡，用P仔揉麵糰做生煎包的外皮。超鍾意食上海小楊生煎，每次去上海必食。我仲傻到試過買生煎包返屋企，拆開隻生煎包，用磅磅吓個皮有幾重，個餡又有幾重。

今日用煎餃外皮既食譜，用P仔揉麵，揉好後再靜置30分鐘。豬肉絞碎後加些小水令包包有肉汁。

原來生煎包係好難好難包，係youtube又搵唔到清晰既教學，自己惟有硬住頭皮亂包一通。出來的成品，個皮太厚同質感跟小楊差太遠，小楊的皮比較鬆軟及甜，所以個皮應該有加酵母跟糖。不過包包內餡算是有小小肉汁。

呢個包生煎包的技巧，相信要拜師學藝先至攪得掂。

【包餅工房】P仔 - 第一次造型包

2012年4月14日

P仔除了用來整方包外，仲有好多function，如果想做造型包就可單選揉麵糰的function，可幫你將材料搓好同做埋第一次發酵（總共需要1小時)。

麵糰由機內取出，先將麵糰平均分割成12等份，揉成圓形靜置10分鐘。

之後就包上餡料，今日有4種口味，分別是朱古力流心、芝士火腿、腸仔、肉鬆。

包上餡料後就開始第二次發酵，30℃大約需時30分鐘，雖然今日好熱但未去到30℃，發酵時間就要加長，總之包包有2倍大及手指篤入麵糰後不回彈，就算完成發酵。

入爐前在包面塗上蛋汁及加上topping，加上不同topping幫我分辨不同的包包，黑芝麻topping是肉鬆包，朱古力粒是朱古力流心包，咸包梗係要加芝士係包面增加風味。

可能因為我的焗爐有熱風，所以包面被吹到較乾身，唔似外面買的包面係軟身的，下次要研究點樣去改善。

四種口味都鍾意，細細個容易食，好容易o趙吓一個o趙吓又一個。