香草新丁(1)

2009年5月28日
今朝去左花墟, 行了一個早上, 目標就是買香草, 一人開伙食西餐最方便, 但煮西餐離不開香草, 就好似中國人炆野一定加八角, 去market place同city'super買香草, 大都是外國入口, 價錢貴得令人咋舌, 20g basil賣40蚊, 嚇死人。見不少香港既blogger煮西餐時好豪咁落好多不同既香草, 後來發現原來佢地都係自己種香草, 怪不得要幾多有幾多。

自己已經10+年冇種過任何花花草草, 對上一次種應該仲係學生時代, 養過一棵文竹, 不過後來惹來好多蚊好可怕, 掉咗後再冇種過植物。

去之前已經上呢度http://www.hkplants.com/index.php扒文,做好reseach。最後敲定目標為迷迭香同sweet basil呢兩種最大路、自己又最常用到既herb。

其實睇"敗犬女王"時挑起條筋, 想學人種風信子, 可惜依家未係時候, 要等秋天先可以下手。

最後用$25買咗盤迷迭香, $15買咗盤sweet basil。嘩!!啲basil真係好便宜, 就算只係用得一次都平過去超市買。再敗多一盤白色蝴蝶蘭, 呢盤蝴蝶蘭一球出2枝花, 比一般一球出一支花特別。

韓版花樣男子

2009年5月25日
J2 開始播花樣男子。不知道花樣男子? 總聽過"流星花園"吧! 2001年台版的流星花園紅遍東南亞, 今次韓國根據同一套漫畫, 在2009年重新詮釋的花樣男子, 讓人不期待都很難 。

今次的花樣男子比流星花園好看嗎?這過問題真是人言人殊。不過看完後(我早個多月前已看完囉), F4的選角及角色塑造比流星花園好, 不過女主角金絲草(具慧善)真的很一般, 大S好過她太多了, 具慧善失敗的地方是她演釋不出為何F4對金絲草大大的折服。

F4..... 先讓我尖叫一下, 對比台版的肌肉男, 韓版的F4實在靚仔多了:

具俊表/道明寺司(李民鎬)的身高, 身材, 樣貌及聲音均無可挑剔, 細看他的面容, 鼻子以上活脫是劉德華的倒模, 不過他的輪廓比劉更立體。

尹智厚/花澤類(金賢重) - 年輕版的裴勇俊, 第一眼真的以為是後生十多年的裴勇俊走出來, 笑容尤其似。

蘇易正/西門總二郎(金範) - 迷死人的笑容, 笑起來有深深酒渦的男孩子誰不喜歡? 韓版將西門為何是花花公子的背景交待得很清晰, 令這個角色的討喜指數大大上升。

宋宇彬/美作玲(金俊) - 台版的美作完全是一塊佈景版, 除了記得他的one length頭以外, 整個角色在流星花園都是面目模糊, 韓版的美作有個性得多了, 而且樣貌雖比不上李民浩, 不過總比台版的美作靚仔。

看完花樣男子, 我心中F4的排名是：道明寺>西門>美作>花澤類

為什麼花澤類包尾? 冇辦法,我一向對很anti花澤類這種類型的人。所以任誰來演我都不會喜歡喇, 因為我跟道明寺是同一掛的。

我喜歡韓版多於台版, 因為台版分開上下兩部, 到下部已經在拖拖拉拉, 註定失敗, 而韓版用25集就將台版兩部要說的說完, 可以想像其節奏之快, 所以看韓版最好先有台版或日版墊底, 不然會覺得情節跳轉得很快。

和牛

2009年4月30日

煎牛扒應該係最冇難度既晚餐, 之前係City'Super以4折價錢買咗Le Creuset 隻Square Skillet Grill, 用來煎呢塊和牛, Le Creuset果然名不虛傳, 煎出來一條條炭燒坑紋, 靚之餘火路又平均, 唔會個邊熟曬但係中間部份就仍然生勾勾。而pan上的橫紋溝槽能讓多餘的油脂滴落,令牛排多汁不油膩。鍾意煎扒食既朋友一定唔可以錯過呢隻pan。

掛住食唔記得影成品照。

牛下

4月27日

牛下 - 對這個地方唯一既印象係有一個姑媽曾經居住過牛下，之後搬了去樂華邨，而這一個姑媽亦已在多年前去世。自此我與牛下變得風馬牛毫不相干。

跟牛下拉上關係是因為: (1)我公司跟牛下只是隔條馬路; (2) 最近為方便上班而搬了家，我家跟牛下又係只隔條馬路; (3) 跟我現時一起工作的同事，有一部份是在牛下長大，長大成家後才搬離此區，他們對牛下的感情相當深刻，所以連續好幾個星期他們都在牛下攪飯局。通過他們令我對牛下多了點認識。就因以上原因，意外地令我有機會見證牛下最後的一段日子。

自從政府一次又一次的拆除舊建築物，激發許多香港人的懷舊情緒，牛下忽成了旺地，一到晚上和假日牛下出名的老店：興記、源發、輝煌、鳳凰冰室、何興記牛什等均人頭湧湧。托著一支支大鏡頭來影懷舊照片的拍友更是行3步見一個走5步見一群。我想有這麼多人的支持，牛下這最後一段日子可說是走得風風光光。

對牛下的老店，沒有很大的感覺，店面雖舊但店員一點也不舊，個個年輕力壯，不像一些貨真價實的老店, 企堂的全是5、60過外的叔父輩人物，硬件或許差不多但正是這些軟件令人的感覺不同。

無論如何,朋友們：如果想感受一下牛下最後的光輝，就要趕快把握時間！

鋼琴第4課

2009年3月23日

因為工作今天遲了到教室，只上了半堂的課。哎！我之前玩"Rayman Raving Rabbids"都知道自己對節奏既敏感度好低，依家先發覺數唔到拍子係冇辦法彈琴, 唔得呀我好想彈琴, 要諗下解救既方法，冇可能咁快就投降。

心情壞

2009年3月22日

天氣濕濕熱熱，悶悶的心情也跟著低氣壓走，偶爾還想起仔仔，不知道他過得可好．．．　

法式洋蔥湯

2009年3月18日

超喜歡洋蔥湯，簡單又好味，唔明白點解冇乜西餐廳用洋蔥湯做餐湯。今日既食譜又係抄自Miss Jubieshttp://hk.myblog.yahoo.com/miss-jubie/article?mid=7544的blog, 又易整又好味, 整好出來聞到陣陣香味自已都有點感動。再grill一件鋪滿herb既羊排, 唔洗半小時就有一頓美味晚餐來慰勞自己一天工作的辛勞，so good!!!

(圖片後補)

鋼琴第3課

2009年3月16日

今日練多3隻新歌: row row row the boat, red river valley同Clementine。呢幾首曲主要訓練數拍子, 依家勉強可以睇住五線譜彈歌仔,唔係靠c,d,e,f,g認位, 老師話一定要學識睇五線譜, 如果太依靠數字同字母以後彈更複雜既歌就會好困難,所以依家好努力咁認五線譜。

鋼琴第2課

2009年3月9日

冇估到進度係去得咁快, 我以為自己已經好勤力, 係今日上堂之前預先練定整整一版曲譜, 但係原來今日係要彈3版曲譜, 真係彈到手軟, 下次要練多幾版先去上堂,唔係真係好快會追唔上。

今日彈咗:
貝多芬 - 快樂頌既開頭一小段
Twinkle Twinkle Little Star
Aura Lee
Here we are
Old MacDonald
Yankee Doodle
Ten Little Indians

鋼琴第一課

2009年3月2日

識我既人都知道我係一個冇時停既人，終於安定係香港之後，又坐唔定要搵啲嘢攪，今年為自己訂了幾個目標，第一個目標就係開始學琴。7-8年前曾經係歐瑞強既音樂農莊學過彈流行曲，當時仲問舊同事Ella借咗個電子琴練習，不過當時係玩玩吓冇考慮到原來真係要投放好多時間去練習，未上完半個course就已經宣佈投降，浪費銀紙同時間。

今次捲土重來考慮咗好耐，知道如果要真正學懂彈必須要投放時間心機努力練習，如果大家有睇outliers這書，書中提及苦練是成功人士背後不可以缺少的重要元素，作者就在書中提出了一萬小時理論，指出沒有天材不是經過一萬小時的苦練才成器。是不是要苦練一萬小時練習才成器並不重要，重要的是作者點出"苦練"才是硬道理。今次的course為期3個月，答應了自己要好好的努力，如果努力了3個月發覺沒有能耐繼續下去，就真係會死咗條心。

為加強自己既決心就在此立字為據，3個月後再在這裡將結果揭盅。並且通告出文的速度因為練琴及其他攪作會變得更慢，不過會嘗試在這裡記下學琴的經歷。就如今天上第一課前不知道要剪掉指甲，未開始上堂就俾老師"指點""指點"，自己好似變番做幼稚園生，瘀爆。