事事旦旦又一餐

2011年10月26日

昨晚用高壓煲煮白果腐竹蛋糖水，只係用了7分鐘，所有腐竹差不多全部溶化。

焗葡國雞飯+木糠布甸

2011年10月25日

今晚上cooking class學整焗葡國雞飯和木糠布甸，木糠布甸以前在家已經整過，今次係算是重新溫習。

葡國雞飯

材料：白飯、雞蛋、洋蔥、甘筍、薯仔、紅蔥頭、雞腿、淡奶、椰奶。

步驟：

(1)先將雞腿切件醃好。

(2)白飯下油鑊略為炒鬆，加雞蛋炒成蛋炒飯，盛起備用。

(3)洋蔥切片、甘筍及薯仔切塊。下油分別爆香洋蔥、甘筍和薯仔，盛起備用。

(4) 下油爆香紅蔥頭下雞腿，爆至金黃色後下黃薑粉略炒。

(5) 加上湯、淡奶和一半椰奶，再加入洋蔥、甘筍和薯仔，滾開後收細火煮10分鐘至甘筍軟身，加剩下的椰奶，最後下生粉水收汁埋芡。

(6)將飯平舖入焗盤，將(5)倒在上，上面再灑上椰絲和parsley。

(7)放入預熱200ºC焗爐內焗10分鐘至椰絲變金黃色便完成。

(具體份量略過，以免打爛別人飯碗)

自帶的LC烤盤，賣相馬上升level。

木糠布甸

材料：淡忌廉、煉奶、瑪利餅、雲尼拿香油。

步驟：(1)瑪利餅用攪拌機打碎，再過篩。

(2)淡忌廉打至企身，加入煉奶和香油用刮刀輕輕拌勻。

(3)將(2)放入唧袋，先舖一層餅碎在杯內，再唧一層忌廉，重複至杯滿。

(4)放入雪櫃雪至忌廉略硬身便可食用。

跑步日誌 2011-Oct-23

2011年10月23日

今日係每星期的長課(LSD)，設定時間為2小時，集中訓練endurance。跑完後雙膝跟後踭很累，證明雙腿肌肉仍未夠強應付長時間的勞動。

連續跑了1.5小時後的步姿，開始腳軟。

【敗物誌】Cath Kidston 餐具

2011年10月21日

小時候唯一認識的英國home decor品牌是Laura Ashley，不過這個品牌在香港只heat過一段時間，之後就很少再看到，現在只在又一城見有店舖賣小量Laura Ashley的家品。

早2年去日本旅行，無意中發現Cath Kidston(日本人真識貨)，馬上喜歡上它的花花，100%英倫風格，前幾天search開Le Creuset的用品，俾我發現Cath Kidston的官網有e-shopping，而且仲有worldwide delivery。睇均catalog最值得買的是餐具，包包已被大陸翻版打殘，唔值得買。

決定將家裡餐具來個大變身，以Cath Kidston及Le Creuset為主打。星期三晚上10點多下order(英國時間下午3點多)，今日下午DHL就將餐具送上門，全部均為瓷器就算我去到英國買都冇力搬回港 (香港好似沒有地方出售Cath Kidston的餐具，斗室只賣護膚品)，現在只係付35英磅運費就攪定，覺得很化算。

Cath Kidston的小豬撲滿，太好玩了。

Cath Kidston的早餐。

鹹豬手肉批

2011年10月22日

今次係第2次整呢個菜，對上一次整是在2009年12月25日作為x'mas party的starter。呢一道菜材料不複雜，但係費功夫，豬腳要用小火煮3個小時，之後要放係雪櫃冷凍8小時，足足要花半天時間。有高壓煲後這道菜變得容易多了。

豬腳、蔥、洋蔥、蘋果醋、鹽、甘筍，放入大鍋中加水，水要蓋過所有材料。用猛火煮滾後改細火煮3小時，我用壓力煲時間設定為45分鐘。煮好後將豬手及甘筍切小粒攪均，將混合物倒入餐盒內壓平，上面再放罐頭壓著幫助定形。

一只大豬手加上甘筍出來的成品，填不滿一個容量只有480ml的飯盒。

剩下的肉湯我沒有浪費，隔渣去油後用來做雜菜湯的湯底。

這兩個星期很努力的煮食，每天變著餸菜的花樣，雖然自煮自食，不過樂在其中，亦攰死人。

第一代雪糕蛋糕

2011年10月21日

今日的餸菜全部係market place攪掂，燒雞扒、上火的焗魚手指、下火的皮蛋芫茜魚片湯。甜品係在香港消失了一段很長時間的"雀目牌"雪糕蛋糕，估不到又再係超市出現。

照燒雞扒食不到照燒味，似豉油雞扒多啲。魚手指不用油炸，用焗爐焗就可以，super省力省油。

【敗物誌】Chloé Marcie Medium Leather Satchel

2011年10月20日

將錢用來買股票，全部變成大閘蟹，不如用來買吓袋仲冇咁傷，起碼有件野係手開心吓。Chloé既袋大多用牛皮，未放東西已經好重，因此一直都冇下手，不過近期俾我發現出了隻小窩釘羊皮的satchel，價錢沒有比牛皮貴太多算合理，當然又係心動不如行動，速速將之私有化。

香草燒法國春雞

2011年10月19日

第一次處理一隻全雞，成隻死雞係面前覺得好恐怖，不過要克服此心理障礙，法國春雞體積較細而且沒有雞頭、雞頸及內臟比較容易啲接受。

香草：parsley, thyme跟切碎蒜頭攪均，抹均春雞全身，醃2-3小時。

配料：甘筍、洋蔥、西芹及煙肉切小丁，用煙肉起鍋，加入所有蔬菜略炒至軟身。將配料釀入雞腔內。

180ºC 焗30分鐘；再用200ºC焗25分鐘讓雞皮烤至金黃色。

伴菜是椰菜絲沙津(Coleslaw salads)，跟下面的video做，不過我唔鍾意食蔥，所以走蔥，家裡冇sour cream又飛sour cream，鍾意酸啲加重蘋果醋。

自找麻煩之椰青燉蛋白

2011年10月17日

星期日晚上浴室洗手盤連接水龍頭的水喉爆裂，攪到浴室水浸，爆喉波及洗手盤下面儲物櫃，入住2年才知道自己並不知道家裡的水掣位置，當時真係手忙腳亂，今日將洗手盤整套水龍頭更換後，終可回復往日的安寧。

辛苦過後，總要慰勞一下自己，係雪櫃摷出早兩日買的椰青，來一客養顏甜點好好獎勵自己，係網上睇人教開椰青好似好容易，原來一啲都唔易，花盡九牛二虎之力，錘仔、螺絲批、菜刀全出動才攪定。完成後想這不是慰勞而是自找麻煩，收拾浴室已經夠累，僅餘的氣力還要跟椰青搏鬥，不是自找麻煩是什麼？

椰青燉蛋白做法挺簡單：蛋白2只、鮮奶200ml、糖隨意，3種材料攪均，倒入椰青隔水燉20分鐘至蛋白凝固。

日式豬軟骨

2011年10月16日

有了新玩具，有大量菜式等著嘗試，今日托家人幫我係街市買到豬軟骨，是日晚餐就是豬軟骨＋札幌味噌拉麵。

汁料：味醂、日本醬油、糖和水。煮滾汁料後加入已飛水的豬軟骨煮1-1.5小時，用高速煲只需20分鐘，煮好後用明火再煮10分鐘，感覺更入味。