焗葡國雞飯+木糠布甸

2011年10月25日

今晚上cooking class學整焗葡國雞飯和木糠布甸，木糠布甸以前在家已經整過，今次係算是重新溫習。

葡國雞飯

材料：白飯、雞蛋、洋蔥、甘筍、薯仔、紅蔥頭、雞腿、淡奶、椰奶。

步驟：

(1)先將雞腿切件醃好。

(2)白飯下油鑊略為炒鬆，加雞蛋炒成蛋炒飯，盛起備用。

(3)洋蔥切片、甘筍及薯仔切塊。下油分別爆香洋蔥、甘筍和薯仔，盛起備用。

(4) 下油爆香紅蔥頭下雞腿，爆至金黃色後下黃薑粉略炒。

(5) 加上湯、淡奶和一半椰奶，再加入洋蔥、甘筍和薯仔，滾開後收細火煮10分鐘至甘筍軟身，加剩下的椰奶，最後下生粉水收汁埋芡。

(6)將飯平舖入焗盤，將(5)倒在上，上面再灑上椰絲和parsley。

(7)放入預熱200ºC焗爐內焗10分鐘至椰絲變金黃色便完成。

(具體份量略過，以免打爛別人飯碗)

自帶的LC烤盤，賣相馬上升level。

木糠布甸

材料：淡忌廉、煉奶、瑪利餅、雲尼拿香油。

步驟：(1)瑪利餅用攪拌機打碎，再過篩。

(2)淡忌廉打至企身，加入煉奶和香油用刮刀輕輕拌勻。

(3)將(2)放入唧袋，先舖一層餅碎在杯內，再唧一層忌廉，重複至杯滿。

(4)放入雪櫃雪至忌廉略硬身便可食用。