Project U - 訂門＆其他

2012年11月4日

今日交了幾件功課：
(1) 訂全屋木門 - 今日去“和Ｘ”搞定所有門及門框，第一次去“和Ｘ”揀門時6"大門實木框報價係HK$1,770，現在改8"大門實木框索價HK$2,960，要多付HK$1,190，不過總比買2個門框併合便宜。其實都幾貴，一個門框比一度實心大門更貴。

因為要“和Ｘ”在大門開暗鼓的孔，“和Ｘ”要求立刻俾開孔呎吋，好在自己有做功課知道暗鼓、門鉸等買一隻叫Bonco的牌子應該冇鑊氣，行去下一條街的五金店即買暗鼓(HK$520)，再將圖紙拎俾“和Ｘ”，木門算做搞掂。

(2) 諗了2天終於都係reject PM提議廚房唔造鋁天花，改為用燈糟，我想區分吧櫃跟廚房(雖然分別不大)，吧枱上燈槽安射燈，不過我想安裝吊燈，去飛利浦網頁睇過下，有幾支燈都幾靚，不過未開始去淘寶淘，去淘寶應該可以淘到不少好東西。

(3) PM問吧櫃向飯廳的一面用什麼材料，一直以為會用西德板，所以PM問我我有些surprise，佢建議用灰鏡之類，但我最討厭用鏡來做建材，佢又話馬賽克，馬賽克我ok，不過要我睇得上眼既馬賽克可能到PM厭貴唔OK，今日出開去買門順路睇下馬賽克及其他可以考慮的物料。

選擇一

如果唔需要理會價錢及難度，呢個係第一選擇，立體3D磚，不過除了貴(600x600；HK$380)以外，我唔知師傅有冇合適工具去界開塊磚，塊磚既波浪係立體的(睇到的陰影部份不是印刷效果，係真實的陰影)，同埋對花都係一大難度，但做出來肯定靚爆。

選擇二，價錢貴過選擇一(HK$108/呎)，不過工藝上會容易過選擇一，呢個係blink blink效果。

選擇三：都係馬賽克，不過比選擇二便宜一些。

選擇四：用番我心心念念的白色文化牆，材料費最平一箱HK$200+，可以砌到8-10呎，不過手工就要多啲。

選擇五：雪白雲石，價錢中等600x600一塊要HK$118，工藝上應該比以上三項都簡單。 

 我諗我send呢啲料俾PM一定會嚇壞佢。

(4) 訂了抽油煙機 - 富士Ｘ　GF700V
10月頭去荃灣專門店睇機及問均所有細節，當日價錢係HK$7,180，Sales話今年都仲會係呢個價，出年會加價，心諗我今年內一定會幫襯，出年加價唔關我事，咁就大安旨意將件事暫時放低，裝修已經開工一個月都係時候訂機，今日落去place order價錢居然加了？！？！

依家係HK$7,580，今日我冇帶個budget出街，冇留意加了價照落order，晚上返居企check番先睇到係加了價，即係火冒三呎，個sales又話今年唔加價！！打電話落舖投訴，個sales梗係唔認賬，先禮後兵同sales講我會寫個email去佢公司complain呢件事。

Sales話我知係11月1日開始加價，10月中係網頁出通告，如果唔係個sales話出年先加價，我就唔會大安旨意，依家無情情俾多HK$400真係好唔忿氣，點都要攞番個公道，不過真係唔知呢啲公司既管理係點樣，5：5波。不管結果係點，部機都已經訂了，亦冇諗過有其他替代品，比佢搶多HK$400都冇佢辦法。