Project U - Day 25 中場休息

2012年11月6日

今日仍然冇師傅開工，主要都係我跟PM在忙，PM昨晚出了第一稿圖，今晚同PM困獸鬥2個小時睇圖改圖，最終傾妥廚房櫃、浴室櫃及鞋櫃的做法、用料等細節。再覆實窗邊雲石、級咀、地腳線、油漆顏色材料等等。

浴室圖

 

吧枱正面及背面圖

 

廚房圖

吧枱的報價係HK$4,000，只包單面西德板跟一張cheap cheap無縫石枱面，現在再加一層無縫石枱面及吧枱背板，全部要加料錢，如果技術複雜再加工錢。

所以一張吧櫃又令我大出血，拗不過PM，佢話一定要用無縫石，深不到一呎的Ｌ型面板，長度計8呎，用Corian一呎要HK$950，即係呢個Ｌ型就要花費HK$7,600，問題係我覺得唔值得去花呢筆錢，其實好主觀值得既再多都願意俾，覺得唔值既要我多花一蚊都覺得貴，最後當然唔要Corian，揀隻cheap cheap約HK$380呎的大陸無縫石，計埋手工及其他希望HK$3,500內攪得掂。

另一出血位，係吧櫃面板，最終用西德板，要加多幾多錢仲未知，不過手工費應該唔會好多，料錢亦不會係天價，跟PM討論過其他選擇，唔係料錢貴就係手工費貴，佢一早應該建議用西德板，咁就唔洗我睇一大輪，我估計整張吧枱總共約花費HK$9,000。

而鞋櫃就峰迴路轉，PM話鞋櫃太複雜都係番大陸造，再運返來師傅做封邊收口，對此我冇咩意見，佢唔加我價就點樣都冇所謂。

燈槽，鋁天花，每個櫃的內櫳間隔、長闊高等等都討論過一次，現在等PM再出多次圖紙，confirm OK就可以開工。

其實明白進度點解會慢下來，咪就係因為未出糧囉，按合同泥水完畢後要再付40%，PM唔收錢又怎會開始下一回合，咁佢唔開聲我又冇理由提佢收錢，今日佢叫我去睇圖紙，另一個重要目的就係收錢，希望佢收錢後快啲再開工，等我日日有嘢睇。

開頭擔心唔夠地磚，現在剩得最多的好似係地磚。呢堆剩磚價值超過HK$500，所以估計訂磚數量好重要，不然像現在掉錢落垃圾桶。

今日大出血之中，都有好消息，就係富士ｘ收到我投訴後肯用番舊價賣機俾我，還我一個公道。