Project U - Day 46 鑊氣

2012年11月30日

師傅話咁快就上咗個鞋櫃，但係背後幅牆乜都未做，叫PM卸番個櫃落來，做好幅牆先佢話”修口傢俬，唔同現成傢俬，要裝完傢俬跟尾收口”，完全唔理睬我的要求，咁係咪偷工減料？？


幅牆都未批灰，所以牆身唔平。未上油做好保護就上櫃，咁背後幅牆點算。

其實係個櫃唔直，定係幅牆唔直？

師傅今日攪地腳線。

一天就做完。

燈糟開孔搞掂。

櫃門只欠上翻平移門及下面的門。

櫃內的層板都搞掂。

上了洗手盤，不過塊無縫石隻色唔夠白，跟個洗面盤有色差較大，失敗。

點解突咗出來？？？

點解有條邊，唔係應該平櫃身？ 

Project U - Day 45 木工繼續埋尾

2012年11月29日

木工已經完成得八八九九，垃圾又清埋，見師傅啲工具都收拾好，似乎準備隨時撤退。

無縫石枱面已安裝好，鋅盤都搞掂埋。

張吧枱終於搞掂。

浴室都搞掂，仲未安裝洗面盤，不過浴室塊無縫石就唔係做得咁好。條邊突出了一分，同埋個洗手盤開孔做得差。

唔知點解門框有一點點窿，要跟PM跟進睇吓咩事。

焗爐的出風口

雲石吸咀及窗邊雲石，我估今日裝埋啲雲石＆門板師傅就收工，下星期油漆師傅上場。

Project U - Day 44 木工師傅埋尾

2012年11月28日

今日木工師傅密密做，大致完成了所有木工工作，門跟門框已經全部完成，門鎖及門頂亦已搞掂。窗簾殼做好，櫃桶及層板完成，訂做的門板亦已送到，今日上埋門板，幫電工師傅開埋射燈孔，我諗木工師傅可以收得工。清完垃圾後，等油漆師傅油埋牆及天花，就可以交貨。

PM已經幫我買好鋅盤。

西德門板亦已READY，不過主人房變成臨時垃圾房，垃圾堆積如山。

櫃桶跟層板全部完成。

4"闊的窗簾殼OK，拉簾後條喉會消失。

房門鎖裝好，不過隻色揀得麻麻地靚。

門頂就位

Project U - Day 43 裝門及鎖

2011年11月27日

今日師傅裝門，不過咁快裝門好驚啲門會整花。裝得門就一定要裝埋把鎖，PM手下的師傅真係唔錯，又快手又OK。跟PM講好鐵定15/Dec搬屋，佢答冇問題，咁就即刻約搬屋公司quot價，越來越近D-day，諗起要執屋就好驚，三年前搬只有個人物品，今時今日已經多了好多大件傢俬及其他家品，單係件鋼琴就夠讓人操心。天生購物狂終嚐到狂買的side effect，真係好大鑊。

大門及電子鎖

大門暗鼓

大門的背面，鴛鴦色，外面係薰衣草色，裡面是白手掃漆，外門框尚未裝上。

三度房門已經搞掂，兩間房已經上了門，仍有一度進行中。

主人房門，其實3度房門一模一樣。

估計呢件係鞋櫃，唔知幾時會安裝。今日電工師傅會畫射燈位置，明天要睇下收唔收貨。

Project U - Day 42 木工(10)

2012年11月26日

今日有一位師傅開工，主要都係整層板＆做餘下的飾面工作。和ｘ的大門／房門／門框已經送來，PM已經買好大門用的指紋鎖，又幫我買了門鉸及門頂，基本上所有有關門的配件都已齊備，唔知師傅幾時開始裝門，裝門係一件複雜的工作，因為準確度要求很高，希望順順利利。

層板已完成

SAMSUNG電子指紋鎖

和X的大門包裝得好嚴實，仲未睇到件貨的真身，要等師傅來驗貨。

門框

我在淘寶淘的可視門鈴。照明控制系統，將燈槽分成六組，用遙控控制六組燈的開關，希望電工師傅搞得掂。
另外，3把房門鎖&防盜扣。

一早已經買好的大門暗鼓

PM幫手買的門鉸及門頂。

Project U - Day 41 師傅繼續休息

2012年11月24日

今日冇師傅開工，我就繼續忙傢俬。剩下TV櫃仍未有著落，海怡跟IKEA均冇啱SIZE又款靚的TV櫃，Home Square睇中一個不過要HK$6,000out了budget，之前係網上見過一個屋主自己設計及訂造的都幾啱我心水，自已初步劃了圖紙做好兩手準備，一係買現成的一係抄款訂造，今日去了土瓜灣的傢俱店巡了一遍，選擇小冇啱心水的，詢問訂造呎價由HK$1180-1680/呎，完全負擔不起。

返荃灣繼續搜索，荃灣廣場6樓冇收獲，再去逛荃灣街市街的傢俬店，見一家特別好生意，行過一遍後決定去最好生意的一家碰運氣，訂造TV櫃HK$550/呎，如果有特別難度再議。終於俾我搵到，拎圖紙跟上網download的資料俾駐場的製圖師傅，即場畫圖/揀料/報價，中間的小曲折不贅，製圖師傅好好人，超有耐性同nice，我啲呎吋改來改去都冇唔耐煩，又俾好多意見。最終花了HK$3,890訂造了心目中想要的TV櫃，超高興。

不過TV櫃的櫃桶用了木色，希望不會跟石頭灰色的梳化有太大的不協調。

另外跑了兩個地方，買了3把房門手把連鎖及部份電掣，今個weekend又係東奔西跑，累死我。

Project U - Day 40 裝冷氣及收餐枱凳圖紙

2012年11月23日

今日早上落大雨，擔心影響安裝冷氣的進度，不過都係如期順利安裝好。

廳的窗口式分體，P記兩匹窗口式分體HK$7,640(安裝費HK$2,200)。

喉管由外牆出，PM一開始開價HK$6,000兩部做入牆暗喉，依家HK$3,700搞掂兩部，一部做暗喉一部做明喉，化算好多。

主人房出明喉，不過條喉會被窗簾遮蓋，唔會好似依家咁肉酸。P記一匹窗口式分體HK$3,890(安裝費HK$1,500)。

冷氣師傅居然係2吋半孔內出到2條喉，勁呀！

不過PM臨急臨忙要我安排裝冷氣，搞到我忘記買地蓆俾師傅舖係室外機機頂，以減少下雨時雨水打在機頂製造的噪音，依家只希望主人房塊隔音玻璃有用，可阻隔雨聲，而客廳個部就冇得救。
另外，收到傢俬公司的圖紙，餐枱根據標準呎吋作出修改，本來腳粗係10cm x 5cm，因為要遷就Master Chair的57cm的闊度，腳粗改為6cm x 10cm，令到2張Master Chair可以平排推入枱下。而長bench則做短5cm，變為長115cm改了後又係可以推入枱下收藏。現時暫定12月22日收貨。