【包餅工房】P仔 - 大理石麵包

2012年4月8日

失敗乃成功之母，昨日整大理石麵包失敗，今日再接再厲終於成功。關鍵係嚿軟朱古力，食譜書冇教點整件軟朱古力，只係講軟朱古力重150g。昨日用100g一排既瑞士蓮朱古力加50g奶，用熱水座溶朱古力後，整成四方型，擺入雪櫃。

點知朱古力唔夠凍，加上麵糰本身有熱度，軟朱古力包入麵糰後溶化成漿，用擀麵棍轆轆吓爆漿，最終失敗收場，將爆漿包包掉番入麵包桶繼續烘焙，出來樣子古怪，幸好味道好好。

反正買了2排朱古力，今日再試過，昨晚將100g朱古力加20g牛奶用同一方法整成軟朱古力片，今次放入冰箱冷藏一晚。

因為呢塊軟朱古力夠凍，所以今次冇溶化爆漿，不過整呢個一定要手快，同埋如果天氣熱就一定要開住冷氣整。

出來的成品雖然不算高大，但好滿意，同食譜書個demo有8分似。