2012年8月14日
今日簽了臨約，一直深信買樓係講緣份，一早鎖定現時的樓盤，就算家人、經紀＆銀行朋友提議考慮其他樓盤都未有令我動搖，三月接觸現時的地產經紀睇過一陣，心儀的單位被人用更高價錢搶走，嗰陣已經覺得呎價高，想睇定啲再出手，之後停了幾個月，呎價一直升高，上月尾因某些外在原因，又搵番個經紀再出動睇樓。
前後睇了10幾個盤，揀中2個單位最後都無功而還：反價又有，封盤又有。已經同經紀講再冇盤介紹就唔再睇，而就在快放棄時，經紀行接了一個新放盤，因物業才剛剛交吉，地產只初步同業主傾過連鎖匙都未交地產舖。因為對呢個樓盤實在太熟悉，未睇就大致知道情況，同經紀講好業主一放低鎖匙，我＆家人就馬上去睇，睇完即還價。
仲有就係同行如敵國，因為現時盤小，經紀間爭盤情況嚴重，幸好我睇中的係獨家代理，冇其他地產公司競爭，睇樓後我主動約經紀去McDonald寫臨約，避免同行經紀知道情況快馬call客同我搶盤，三月份個次都係獨家盤，但就俾同行的經紀搶走，吃一次虧學一次乖。
最後如計劃進行，睇完馬上還價，同埋我的策略一向會放定“細訂”支票係地產舖，經紀拎住張支票會比較容易同業主傾買賣。業主okay後即收票，可杜絕業主反悔的風險，當然張票既銀碼要足夠大，令業主唔會撻訂。
初步的戰略成功，以快打慢，可惜天一向不從人願，我okay到業主要離港工幹三天，三天可以有好多變數發生，其他經紀有客睇中，出高過我的價錢搶盤，業主接收近日成交訊息後反價......
不過好好彩，因為之前已經衰咗幾個盤，連地產舖的manager都認識了，今次由佢出手，唔俾其他經紀搶盤，用電話同業主初步agree價錢，業主今早回港就即到地產舖簽臨約，冇多餘時間俾佢吸收市場資訊（不過聽經紀講個業主係想反價的，不過最終被勸服），最終我以比各銀行估價低5-20萬價位成交，我估係近期呢個樓盤買賣的奇葩，近期買賣如果個盤有啲質素 ，業主的價通常都企得好硬，有時仲只係底價，買家要追加才可以成交，今次成交低過業主叫價小小，又低過銀行估價成交真係好夠運。不過整件事地產舖manager起了決定性的作用，唔係佢封住其他經紀，我未必可以以呢個筍價（其實都係市場價，不過算係合理的市場價）成交。
沒有留言:
發佈留言