Project U - Day 10 電工埋尾＆搬煤氣錶

2012年10月18日

今日PM叫我安排送磁磚，我安排下星期一到，PM話要今個星期六到，今日已經係星期四，突然咁急！咁勤力係美德，惟有麻煩南記的Jack兄再安排安排。咁即係預告下個星期開始鋪磁磚！(*v*)

問PM係咪漏咗個吧枱孖蘇，答案是會藏喉係連著吧枱的直身櫃落吧枱，吾係我諗既由地面上吧枱，總之冇漏就okay。

今日醒起要check個熱毛巾架的插蘇位置，發覺整得好高，同唔同PM講好呢?

 今日電工已經清場，明天應該係交個場俾泥水師傅。

今日最大的改變係煤氣錶終於搬了位，都估到唔會搬去我理想的左上角，而只係搬去左下角，不過都好至少解決了焗爐擺位的問題，不過已經唔實用既廚櫃就變得更加唔實用，上面的廚櫃一邊要藏抽油煙機的喉，另一邊要放電箱已經廢了大半武功，下面的廚櫃更加可憐，放了焗爐、洗碗碟機、鋅盆來去水、煤氣錶、濾水器等後空間已經所剩無己。啲煲煲罉罉只有靠吧枱下的儲物空間頂住，面對一個空間咁細小的廚房，真係冇可能唔改它做Open kitchen。

外牆煤氣管加了個開關掣，好似更加安全，廚房至浴室的煤氣供應走外牆，不是在室內藏喉，希望管理處唔會諸多留難。搬煤氣錶及換喉：HK$5,800

 煤氣喉由外牆穿入浴室。

 睇清楚啲煤氣喉的鋪排路線。

今日係第10日，合同上的裝修期係50日，剛好過了1/5，水電煤都已經攪掂，暫時我對進度好滿意，希望繼續落去都可以咁順暢。

睇住開初跟PM講我天馬行空的諸多要求，現在一點一滴的慢慢實現，感到好amazing。