縱橫四海: 3月 2012

2012年3月30日星期五

【包餅工房】P仔 - 手撕包

2012年3月31日

上BK好多JM整手撕包，我今日係第一次整，本來想整芝士腸仔包，不過老柏，係冰箱拎了腸仔出來溶雪，但包餡時卻忘記了腸仔，所以今日既出品係芝士包only。

今次跟說明書function1 軟吐司既食譜，軟吐司程式共需要4小時，開始後2小時包包在發酵途中拎嚿麵糰出來，分成8份，每份包入大粒芝士，封口後滾圓，外面加手粉防止包包再黏成一糰，將8嚿包包放回麵包桶內上4個下4個繼續發酵跟烘焙。2小時後包包出爐。

跟住每個包包既駁口，慢慢將8個包包撕番出來。

內裡芝士全溶化，下次要去買高溶點芝士，等啲芝士唔好全部溶化。

2012年3月25日星期日

2012年3月25日是日午餐

2012年3月25日

星期日休息日，無無聊聊，淨係想show吓隻Narumi湯碗。

【包餅工房】P仔 - Cuoca咖啡牛奶＆Cuoca番茄麵包

2012年3月25日

有10包cuoca麵包預拌粉，一星期2包都要5個星期才食得完，繼續努力。星期六早餐係cuoca咖啡牛奶方包，星期日係cuoca番茄包，比較之下我用organic番茄粉整的番茄包包味道濃好多，可能我喜歡味重的食物，味道較濃比較合我心水。

咖啡牛奶包包，出來的時候唔知點解包包有幾個窿窿，冇乜咖啡味，不過包包幾軟熟。

星期一係Pacific Club飲了個湯，覺得幾好味，weekend就試下整，湯的材料好簡單：羊肉、洋蔥、甘筍(小小)切成指甲大小再加上Lentils及herbs。

忘記買甘筍，Lentils預先浸2小時，羊肉跟洋蔥下鑊爆香，後加上Lentils用高壓煲煮20分鐘，之後加S&P及herbs調味，整出來的味道只有6成似，雖然味道有差，但我的版本味道都ok。飲過一次就要原原本本的煮返出來，成功的機會本身就係近乎零，but anyway I think it is a good try。

2012年3月24日星期六

【敗家誌】melissa x Jason Wu

2012年3月24日

今星期工作很stressful，昨天剛close a deal，要做下shopping therapy，買咗幾對鞋，其中一對係melissa x Jason Wu的膠鞋，其實已經出咗幾個月，不過見個顏色個名“Burgundy”幾襯隻色，對鞋又唔係貴，不過最唔like係對鞋的candy smell，香味既嘢係見仁見智，我勁唔like隻香味，要放對鞋係通風處吹走啲味道先可以穿。

2012年3月20日星期二

【包餅工房】P仔 - Cuoca香蕉牛奶麵包

2012年3月20日

繼續整包包，上次整蘋果玉桂方包，因為落小了酵母導致包包發育不良，今次跟足instruction落3g酵母，4小時吐司程式，只係減了水的份量，出來包包高度合格，不過跟蘋果玉桂比較，香蕉牛奶的香氣跟味道就差很多。

今日忘記了將烤色由標準改為淺色，出來的麵包外皮太深色了。

2012年3月18日星期日

LC - 2012春季Family Sale

2012年3月18日

今日係最後一日，一直猶豫去唔去，早到了15分鐘好好彩係第二輪就入到場。target係細size的buffet casserole，不過只賣剩30cm的大size，最後都係買唔落手。

不過就買了塊size剛好可以放得入焗爐，當然又可以明火燒的方型grill。

早2日先話對stoneware的熱度冷卻，點知仍然失守，見到靚靚的pale rose盤，antique rose碗，lavendar碗碟，仲有好鍾意的carribean blue真係放唔到手。

今次好乖只逗留了1個鐘就走人，因為啲stoneware真係好重，有錢買都冇力拎，我冇好似啲日本媽媽咁拎定行李喼同手推車。不過咁都好，可以令自己買小啲，今日既收獲已經超出預算，如果係頭一兩日去可能更大鑊。

2012年3月17日星期六

【包餅工房】P仔 - 煎鍋貼

2012年3月17日

難得今日有空在家，用p仔整啲對我來說高難度的菜式 - 鍋貼，先用p仔搓好鍋貼皮的麵糰，然後自己擀鍋貼皮，再包上餡料。

將麵糰擀成圓形薄片，其實都唔易，包上餡料仲要整靚個封口，更難。

材料份量係跟之前買的“超人氣”，可以包30只鍋貼，材料費用大約HK$40，雖然花功夫，不過在家做真的慳好多，又唔會有味精同防腐劑。

【包餅工房】P仔 - Cuoca蘋果玉桂麵包

2012年3月17日

擒晚用cuoca蘋果玉桂預拌粉，預較今早9：30出爐的法國軟吐司。不過失敗咗包包發唔起，唔知係咪因為我改了材料份量，究竟係以下3項中既邊項出咗問題，定係全部都關事？

(1) 因為係法國軟吐司程式酵母由3g減到1.4g;

(2) 牛油30g改為菜油30g;

(3) 天氣濕水改由140g至125g

今朝焗前睇過個麵糰正常唔係好濕，咁點解發唔起？

幸好食就冇問題好好味，同埋好香，今朝係俾蘋果既香氣叫醒，好幸福。

2012年3月14日星期三

臘味炒糯米飯

2012年3月14日

過年前買的臘味已經好努力去清貨，依家仲剩低幾孖臘腸，仍需努力。臘味炒糯米飯已經整過幾次，由第一次炒到一嚿嚿，之後又試過炒唔夠熟，到依家叫做合格：熟得來仲係一粒粒，工多藝熟，依家學識用2支spatula左右開弓去炒，又快又均勻，不過真係小啲耐性同臂力都唔掂。

2012年3月11日星期日

大阪 - 酒店

2012年3月11日

好多朋友及blog友都大力推介Swissotel Nankai Hotel，今次住過後，以後到大阪都不用試其他hotel，呢間酒店實在太太太方便。尤其我呢種天生購物狂，每次去日本必定係1個箱去幾個箱返的人。

今次未去到日本已經係網上order了不少東西，所以一早已經決定係玩喼中喼，大喼套小喼，自己的行李只係佔小喼的一半，盡量留多點位置放戰利品。

出機場轉乘南海鐡路到難波站，一出北札口轉左，就是酒店的專用入口，上二層扶手電梯就到酒店大堂，真係超方便。回程時一人拎住2個喼2個手提去趕火車都冇難度。

酒店5樓跟高島屋有室內天橋相連，經高島屋電梯可以直達地下鐡，又可以到Namba City，好似星期五大阪落雨都冇有怕，淨逛地下街都已經足夠。

而且酒店去年才翻新房間，房間乾淨簇新，房間仲有部Nespresso，每早可以飲番杯coffee醒醒神才出動。四月份開始房間仲會有free wifi。此hotel 5星推介«««««。

仲有係位置超好，去心齋橋、道具筋商店街、黑門市場、bic camera等，全部都係10分鐘腳程內，去梅田搭地鐡都係5個站就到CCCCC。

大阪 - 購物篇

2012年3月11日

購物就大有所獲。Confirm機票後馬上登上樂天市場搜購，今次的採購重點有2個：Narumi & 整麵包的工具和材料。

在樂天市場Narumi專賣店買了10件，會在另一篇介紹。

在cuoca網店order了10包麵包預拌粉，在“走糧食”篇會提到。

靚靚電子磅，這個可量0.1g專用來量酵母粉，最靚係粉紅色，可惜買不到，不過紅色都ok，有得退稅10個讚。

還有瑣瑣碎碎的一些廚房用品：卷蛋用烤盤、沙拉夾、可申縮的colander、陶瓷刀、FrancFranc Outlet買的花花吸盤、象印保暖壺。

係梅田間Yodobashi買了個 Sharp出產的 ionic purifier，電壓香港適用。仲有網購的方包保存盒連麵包刀。

在Rinku Premium Outlet 的 Le Creuset買的小匙、粉紅色刮刀、紫色橢圓形小碟，自從中了bone china毒後，對 Le Creuset 的 stoneware降了點溫。不過見到心型漸變粉紅色生鐡鍋仍然心癢癢，可惜已經大箱細箱，不然真的會托番個生鐡鍋回來。

衣服鞋襪方面，都係幫侄女買為主，我著衣風格不是日韓系，所以基本上不用看正裝，省下不少時間跟$$。

今次只逛Uniqlo跟g.u.，買causal及inner wear為主。

日本的Uniqlo有跟外國的designer攪cross-over，cross-over的衣服款式靚好多又便宜，香港未必入貨，有入都未必齊款。g.u.係Uniqlo的副線，定價比Uniqlo平一大截，係不用看價錢事旦掃都唔會令你肉赤，抵到爛。

仲有全店所有飾物均賣315日圓的Lattice，剛在9日係高島屋對面間0101新開了counter，啲日本妹好似蜜蜂見到花花咁，圍滿整個counter，人太多迫來迫去冇辦法慢慢揀，最後都只係買了2條綁頭髮的橡筋。

係買得咁多咋，因為大喼用來裝Narumi已經爆滿，所以買野都要忍吓手，就住就住，不過買到咁多件又平又靚既bone china好滿意。

大阪 - 大食篇

2011年3月11日

用Asia Miles換了2張去大阪的機票，去大阪不外乎吃和shopping。今次的"吃"只是一般，因同行的partner不好美食，又因為改了行程，令原先預定要食的shabu shabu、鰻魚飯、網燒都沒有吃到。

四天王拉麵

黑門市場 - 壽司

Partner唔食魚片類壽司，只食熟的跟貝殼類魚生，我就大啖各種魚生，係張menu內不停篤俾師傅睇要食乜，師傅又唔洗mark低價錢，最後食飽到捧住個肚好滿足的埋單，諗住張10,000日圓肯定走不掉，誰知都只係食了6,090日圓，未試過俾錢俾得咁開心，個咀笑到裂開。啲魚生全部都好新鮮同好味，依家一路寫一路仲好回味。