【敗物誌】New Balance 好唔得

2011年8月12日

之前有提及跑步之後雙腳大咗連自己都唔知道，其後發覺穿開的鞋不合腳才知道。

姐夫介紹去New Balance買鞋，因為佢有部跑步機同器材，佢地用跑步機驗查你的跑姿及腳型，可以幫你揀到合適既鞋。

上星期五約朋友去CWB食飯，另一目的係去New Balance買波鞋，不過去到先至知原來跑步機的測試要預約，我見佢地咁認真，就預約一個星期後再上門。

佢地主要係用攝錄機拍下雙腿跑姿，分析跑步時腳既邊部份著地先，再睇下有冇偏平足等。根據佢地美國既網頁，教我們買鞋最好帶埋對舊鞋去俾店員多啲information知道你既跑步情況，咁我又好聽話咁拎埋對舊鞋去舖頭。我同佢地講有帶對舊鞋，要唔要睇下佢地冇理我，等我山長水又遠大包小包的拎住對波鞋行來行去，激氣。

最後佢地建議買"stability"或"lightweight" model；其實佢地只有三個model揀，剩下的model係俾偏平足用，唔啱我。

"stability"鞋底膠厚啲，相對"lightweight"對雙腳保護多啲。

"lightweight" 特點當然係輕啲，令你可以跑快啲。

最後我選了"stability"，我之前係EU36.5，依家係EU37，Sale Assistant叫我買EU39碼，佢地係professional當然係聽佢地的建議。

第一次試跑就出事，對鞋超重同埋過大，鞋過大唔係好食力，感覺道力去咗膝蓋到，膝蓋唔舒服。鞋重令對腳好易攰，而開始跑到冇力時就更加辛苦。

唔心息，之後穿對厚襪同埋揀係黃昏對腳比較脹大的時候去多一次練跑，結果係冇改變，對鞋仍然唔掂。

回家磅一下對新鞋，足足俾對舊鞋重40%。

花費咁多精神時間仍然係買錯鞋，仲係so call有專業意見指導既情況下。好失敗，之後有向New Balance反映問題，佢地回覆電郵內容超敷衍，唔係要佢地有什麼賠償，但起碼要去了解一下情況，有個交代，HK$700+又成為待回收的垃圾。

所以以後唔會再買New Balance的任何產品，亦唔會建議任何認識既人去買New Balance既波鞋，建議大家買跑鞋都係去買Mizuno的波鞋。我對舊Mizuno特點都係重穩定同保護，但係就輕身好多。

新舊鞋對比，新鞋真係大好多，著上腳已經知道，不過問SA，佢話我對腳闊度正常，佢地啲鞋又標準即係冇問題，跑得耐對腳會腫大，所以更冇問題，雖然明白腳會腫大但不會脹大2個呎碼咁多，而且對鞋一啲都唔包腳，令人跑得好辛苦。唉，我信佢講反而被老點了。