【敗物誌】Valentino Rockstud mini bag

2013年5月8日

好耐冇敗手袋，睇番自己個blog，上次買袋係去年6月，時間過得真快，亦證明裝修真係攪到人都癲，直頭係心力交瘁，連買袋既心情都冇埋，直至今個月先真正回氣。

收到mytheresa免運費的promotion，平常mytheresa的運費要Euro69，運費太貴不太吸引，免運費就變得好抵。當然最先入手既係鞋，不過全部斷碼。

再轉去睇one of my eternal favour - Valentino，V仔啲袋quality好價錢又唔算好誇(可能強國人仲未識貨所以未有搶到貴曬)，又有型夠格(是french chic吧)。

最後敗了一生人第一個紅色袋，買完再上去睇隻袋已經mark "sold out"，即係我買的是最後一只，真好彩。
寄DHL星期一落order星期三收到，very nice。

 

iherb 入貨

2013年5月27日

iherb又有discount買滿US$60以上就有10%discount，買完埋單DHL由美國到香港的運費係US$15.76，而discount有US$15.44，如果將運費減discount，net運費只要US$0.32，好鬼抵買。

今次重點係Thayers 的Rose Petal花水，同埋Lundberg的organic Risotto。花水US$8.6，香港好似冇得賣。

Risotto一盒US$3.09，係Market Place一盒賣HK$50.60，唔係iherb大手入貨真係對唔住自己。

如果係液體iherb會用膠紙封好樽口再用保鮮袋分開包，而易碎品就用瓦通紙包好。

【敗物誌】買鞋

2013年5月26日

係公司穿的高跟鞋某日開始步行時發出吱吱聲，因為高跟鞋只係公司內穿整對鞋仍好新淨，但實在忍受不了佢發出的聲音，都係時候要買replacement。

真的收歛了許多，整季都係入了2對鞋，不過依家份工唔需要四出走動，對鞋的消耗小許多，以前經常係街上走來走去，鞋跟好易花，一花對鞋就certified。

左邊對GZ係舊鞋，依家買鞋個鞋踭越買越矮，以前穿3、4吋好小事，而家買的都係3-5cm內，穿慣了平底返唔到轉頭。

Set Lunch

2013年5月25日

日日返屋企食lunch，雖然時間緊張，都唔可以草草了事，其實事先多做點準備工作，又快又好都唔係好困難。以下4款係常餐：

(1) A貨吉野家肥牛飯

(2) 紫菜五寶麵

(3) 日式帶子拉面

(4) 台灣牛肉麵

以上全部的烹調時間都在10分鐘內。睇了幾本冰箱收納法後，漸漸練成一些小撇步，將每次要吃的份量分好一份份，每次食用就拿出一份，再加上新鮮蔬菜及搭上不同麵類，然後combine埋就攪掂。

以最複雜的台灣牛肉麵為例，我是買一整條牛腱，跟台灣的食譜燉好牛腱，然後將牛腱切件，將湯汁去油隔渣，用保鮮袋一份湯加一份牛腱分成一包包，放入冰箱冷藏，食時將雪成冰塊的湯及牛腱直接加熱，另起一鍋將麵跟菜煮熟隔水，放入碗內淋上翻熱的牛腱及湯汁，香噴噴又味道濃郁的台灣牛肉麵便可以上枱，快靚正。再加杯凍豆漿，花幾十元出街食都係咁上下兼100%冇味精，且在家食更輕鬆自在。

其他幾款就更簡單，就係將每一餐的分量預先用保鮮袋分好，食時就直接由冰箱拎出來直接烹調，又或者返工前由冰格轉去冷凍格解凍。

鍾意食韓國芝士麵，不過好重味精，呢包cheddar & spice我已經買咗好耐，一直唔知點用，早幾日突然諗可唔可以用佢代替芝士麵的味精，原來係得嫁，開心死，呢隻seasoning冇味精，健康又好味，近期my favor。

會繼續準備多啲款式的lunch食物包，on the list的有肉丸雜菜咖哩、豬軟骨、日式叉燒、西班牙海鮮飯．．．．

【敗物誌】gmarket換季

2013年5月8日

每年都會去一次韓國，去年就去了2次，但從未試過買韓國時裝做返工衫，自己的風格不是日韓系，試過係gmarket買外套，穿上後總覺怪怪的，最後只有將衣服送人。但韓國服飾實在是價廉物美，質地又好，每次去都只係買童裝俾侄女。

呢啲日韓style，不是我杯茶。

去年因為知道要搬家，諗起要搬wardrobe就頭痛，所以差不多整整一年沒有替自己換季買新衣，盡量減低搬屋的負擔。現在塵埃落定，新家要添置的亦已完成九九十十。終可替自己換季，行商場boutique啲衫又貴又一般，轉移至我至喜歡的網購，asos的太casual，zara / h&m 又冇新意。Lane Crawford / net-a-porter又未減價，仲未可以下手，止唔到咳。

去開gmarket研究新mask，俾我撞到間走歐美style的shop，如獲至寶，韓國fashion價錢歐美style，so perfect，即大手掃貨。

呢種走歐美風的才是我的style。

今日收貨，今次買得有點多，不過試穿後有2-3件size過大，隔山買牛通常都會出現呢啲問題，不合穿的惟有送人，幸好每件連運費成本都係$200-300+左右，送人都不太肉痛。有了經驗下次買時會更注意呎吋，以為order 66碼(即m碼)一定萬無一失，點知會過大，又怕買55碼(s碼)衣袖會太窄，要再研究一下韓衣的呎吋及cutting。

菜菜週報

2013年5月17日

原來通菜唔夠陽光，又冇剪枝，佢係會不停長高，高到變攀藤植物成2-3呎長好怪異。相反，如果夠陽光，又在主幹長到10cm左右時剪走，迫使長出分枝向橫發展，咁棵通菜就似我地街見到個啲咁。

所以今日將通菜通通剪短，及由aerogarden換去window farm，希望有分枝長出。aerogarden空出的地方仍未諗到點用。

3月跟通菜一起下種子的青椒，已經長得亭亭玉立，不過未見有花開，只見好多花苞死咗，惟有再耐心觀察。

第一造蕃茄有大有細，諗住第二造會比第一造弱，但事實又唔係咁，今期隻隻唔係大碼都有中碼size，非常期待。

中間的2朶花孖住生，出來的番茄又會唔會係連體？

室內水培的好處除了冇虫害外，就係不受天氣影響，香港已經連續個多月成日落雨，如果植物種係室外，我諗唔會似依家咁健康生長，又或者我要做多許多功夫令佢地不受天雨影響，唔似得依家我只係每天加吓水剪吓枯葉就攪掂。

燉花膠

2013年5月1日

今年的main theme係補養，請媽媽買了一斤花膠＆幫忙浸發，包好一包包放入冰箱。趁今日假期用le creuset的湯盅加高速煲燉湯，呢個係完美組合，份量剛好，无需睇火又省時節能。

瘦肉、螺頭切件、花膠。螺頭又係媽媽預先準備好，基本上由冰箱取出材料解凍就可以，有媽的孩子像個寶

放入高速煲燉30分鐘，即明火的2小時。

原汁原味，只需加點鹽調味，yummy。

之前試過用杏汁燉花膠，加冰糖調味，好滋補。