Project U - Day 51 油漆(5)

2012年12月6日

油漆繼續中，跟PM再確認搬屋schedule，要求12日交番個場俾我，我安排好13日收傢俬電器及清潔，14日我在舊屋pack箱，15日早上搬之後unpack及清潔，16日繼續unpack，17日回復正常，正式完成為期2個多月的Project U。

但係PM居然回覆話最快14日先可以交番個場俾我，仲扮到唔係好知我15日搬，好在我跟他的溝通多數用whatsapp，即時摷番個記錄俾佢睇，當時我問佢15日可唔可以搬，係佢答冇問題，佢睇番個record先改口話預鬆啲，如果可以早就早一兩日交個場俾我。有時唔明PM係冇記性定冇心裝載？

依家o/s的項目係(1)油漆; (2) 浴室及廚房鋁天花; (3)窗花; (4)全屋電掣; (5)燈槽燈光; (6) 廚房門板; (7) 房燈/抽氣扇/鏡櫃/可視門鈴安裝; (8) 五金安裝等。我就要係今個weekend將所有o/s的材料搞掂，等師傅可以幫我安裝。

其實仲有一樣o/s就係客廳的窗簾，主人房的窗簾會用番舊屋的窗簾。而客廳的窗簾本來想用實木百頁門，但睇完條窗台雲石覺得有難度，依家心大心細，一係做捲簾，一係做木百頁簾，苦惱中。如果入伙都未度掂，就要用報紙暫時封住個窗先。