Project U - 電器篇

2012年9月24日

電器前前後後修改了好多次，通常到香港討論區的家居設計布置處扒文，不過個度好毒，成日有ching/ctse post啲貴價高檔品出來，睇到流口水。不過budget有限，都係只可欣賞。

冷氣機

本來已經揀中一部一匹一部二匹大金冷暖變頻，但係已經俾師傅ban咗，因為係舊式屋苑，唔可以將部室外機打上外牆，只可以用鋼架拉係窗口位，所以只可以安裝窗口式分體，而窗口式分體係冇冷暖機，我的冬暖夏涼夢破碎。

窗口分體可選的牌子不多，最後揀Panasonic CSV9NWA&CSV18NWA。

洗衣機
對洗衣機毫無認識，唯一一次用洗衣機的經驗係在上海生活時，其餘時間衣物全送洗衣店攪掂，本來睇中whirlpool意大利造洗衣乾衣機，又係俾師傅ban咗，師傅話又洗衣又乾衣大眼仔條膠邊好快打柴，叫我用抽濕機乾衣，唔好買洗衣乾衣兩用機。扒文一致話金章最好，就揀咗呢部ZWS588產地意大利，容量6kg，我一般去洗衣店一次洗4kg衫，6kg應該足夠應付日常需要。

抽油煙機

呢個係估唔到既貴，因為整OPEN KITCHEN，對部抽油煙機的要求特高，扒完曬文各方均推介富士皇，日本產，抽力強、寧靜、易清潔，不過價位貴，不過呢個關乎全屋油煙問題冇得慳。

睇中呢部GF-600V

Built-in Oven

夢寐以求的一件玩具，初時因為煤氣錶問題，師傅話安裝唔到個oven，即刻好灰，不過最後提議裝係bar枱下面，師傅又冇話唔得，即刻開心番。不過budget有限，過萬既唔洗諗。揀咗好耐最終揀Whirlpool意大利產的AKZM752/IX。

洗碗碟機
要我動手做的家務不多，洗碗係日常做得最頻繁的一件家務，當然會諗辦法除之而後快。

SK26E800EU好快就睇中呢部西門子洗碗機西班牙產，不過未搵到安裝圖，未知師傅批唔批准 。

電磁爐

因為係Open kitchen所以唔可以用明火煮食，冇乜用時間search，用番我好like的P記，日本產IH電磁爐，型號：KY-C227B。

雪櫃
係Panasonic及Hitachi之爭，不過我like日立個蔬果格多啲，所以揀Hitachi，日立三門中最slim的一部，R-SG31BPH，一級能源標籤。

浴室寶
本來係必買家電之一，不過扒文後再研究過，最後取消念頭，改為安裝暖燈。

電熱水爐
原本想用番上手業主留下的簡柏熱水爐，不過個爐真係好simple，冇溫度顯示，又唔知係咪恆溫，反正煤氣公司有免息分期，都係換埋佢，暫時睇中呢部超薄恆溫TGC-TSTW168SFR。

微波爐
唔洗點揀，都係幫襯P記，變頻內置式，NN-SD681S。

酒櫃 - optional
叫做人有我又有，打算放係鞋櫃上面，Vinvautz VZ18BN可存18枝酒，聊勝於無。

暫時係咁決定，最終係咪可以如願，要等師傅ok，又要睇彩數，要件電器有貨至得。