超前達標

2010年12月31日
是日放假, 約咗姐夫Mr. K練跑, 對於跑10km, Mr. K早已冇問題。我之前personal best record只係有6km, 早2日係gym練跑時小腿痛, 停下拉筋再跑都係唔掂, 最後跑咗2km就放棄, 對今日的練習冇乜信心, 都係諗住見步行步。今日起點係荃灣西鐵站往麗城花園對出的海傍公園; 預計跑到深井嘉頓後回程, 全程有10km。

跑咗10+分鐘之後小腿又開始扯住痛, 停下拉筋時都好痛, 早2日既情況又發生, Mr. K一早已超前我200+米, 我已經出咗佢既視線範圍, 唔想咁快就認輸, Mr. K又冇帶電話, 想停都通知唔到佢, 超煩, 惟有本著今日死就死喇的心態迫自己唔好放棄, 接住好慢好慢的jogging, 再跑一大段後痛楚開始舒緩, 之後過了汀九橋一段後的有一段上斜, 跑得好辛苦, 到達嘉頓之後好神奇地小腿已經冇痛, 回程跑得好開心同輕鬆, 時間唔算好好用了77分鐘跑10.07公里, 不過能夠係2010年最後一天超前達標完成10km, 真係好開心, 而且仲係在前段辛苦掙扎要不要放棄的情況下。

今日係非常給力的一天, 一直對跑10km冇乜信心, 面前好似有一堵好高的牆, 唔知自己有冇能力翻越。跨過後發現(1)自己原來都ok (2) 原來唔係想像中困難。信心同堅持係非常非常之重要, 同埋對跑步的心態有改變, 而家開始好想跑, 一諗起跑步竟然有小小開心的感覺, 同之前好唔同, 希望呢種感覺持續下去。

不過, 接著要解決2個問題: (1)解決跑初段後小腿痛的問題; (2)提速, 希望可以係60分鐘左右完成10km。