電氈

2008年2月25日

由澳洲返到香港先知道原來香港凍咗咁耐同埋真係好凍，團拜時有朋友因為來不及搶購暖爐而大聲呻苦，此時我必然想起我早幾年的一件best buy．．．．．電氈。

早兩年住係上海，上海係冇中央暖氣系統，但係上海既冬天隨時只得幾度加上多雨，夜晚收工返屋企，入到屋仍然寒氣陣陣，當然第一時間開空調(當時試過一次過開曬家中三部分體式空調搞到燒fuse)，跟住就係開電氈，當瞓入去暖笠笠既被竇時，真係覺得好幸福！而且電氈又唔會好似空調咁令到皮膚好乾。由果陣開始電氈就成為我冬天的必需品。大部份朋友對電氈都有錯覺認為好危險，其實電氈跟其他電器一樣，如果使用不當當然會有危險，通常我都係瞓覺前一小時打開，瞓入被竇時關上，用咗多年都相安無事。我已經不能夠想像冬天冇咗電氈，自己手凍腳凍再縮入凍冰冰的被竇既慘況。

另，我係另一個blog度睇到有個blog友對佢一個住係上海既女性朋友，當佢個廚房係裝飾，成年都未用過，佢飲蒸餾水，連水都唔煲．．．等行徑嘆為觀止。

而我既睇法就係好正常，我係上海住個陣都冇乜用過個廚房，住完一年交吉俾房東時，房東都係度自言自語話個廚房好似新既一樣。而實情係上海搵野食同香港差不多一樣咁容易，一個單身女仔係上海真係冇必要自己煮飯。另外，我係上海一直都係飲蒸餾水，蒸餾水12-14元人民幣一桶，飲完可以打電話去管理處，管理處會即刻聯絡蒸餾水公司送水，非常之方便，因為連上海人都話自來水的水質不佳，寧可飲用蒸餾水也不飲用煲過的自來水，我連煮公仔麵都係用蒸餾水。當生活係唔同既地方就要適應當地的生活習慣，這也是只有你實際的生活在哪個地方才能有的經歷。

PS 我去紐西蘭旅遊時所住既酒店差不多每家的床單底下都舖有電氈，雖然紐西蘭現時是夏天，但看到電氈覺得酒店真的很貼心喲!