拆利是

2008年2月26日 (正月20日)
到咗呢個年紀如果仲喜孜孜的四圍去逗利是，肯定會俾人用口水淹死，所以近年我已經將作風收歛改為被動接受大家順應中國習俗而給予的紅包，又只會單單對極為相熟既朋友發出積極的提醒，對成功拎到利事之後十之八九的朋友都會附贈既一句：「嗱收埋今年好喇，出年輪到你派！」亦只有唯唯諾諾，心想對一個既得利益者來說，真係冇乜誘因去讓我放棄呢個權利。

收利是固然高興，不過拆利是才是重頭戲，我每年都會順應習俗過咗十五先拆利是，雖然說內涵重要過外表，但我仍然會認真的睇下不同利是封的設計，其實利是封既設計都幾考人，因為顏色大小題材都幾乎是固定，所以設計要突圍而出一點都不容易，我偏好卡通化和花梢的設計，上圖的3個利是封就是今年的my favor。