一家5口 - 象印 family

2014年12月18日

晒冷，闊口的3個在gmarket搜回來(3隻合共KRW117,500，折港幣835)，之前係gmarket有運費carried forward，足以支付今次大部份的運費，今次運費只係俾咗KRW600，就運了3隻回來，計落比在香港買便宜。左右的子彈壺是早年在日本買，細的0.48L，大的1.0L。

闊口罐比子彈壺好用，3隻都已開光，0.36L用來焗麥皮做早餐份量剛好， 0.5L試咗整江瑤柱肉丸粥做午餐又試過用來烚蛋，今晚用0.75L整番薯黑糖薑糖水。

 5個size的分別除了容量外，就是保溫時間，子彈壺的保溫比闊口好，越大隻溫度越高。0.36L~57度6小時，0.48L~68度6小時，0.5L~64度6小時，0.75L~71度6小時，1.0L~79度6小時。

一次入3隻好似好誇張，但係佢地各有職責，0.36L用來焗麥皮做早餐，0.5L用來焗桂圓紅棗杞子茶係公司飲，0.75L用來整老火湯／糖水晚上飲，由早到晚都暖粒粒。

用來煲湯0.75L溫度夠高最合適，煮粥／麥皮等細size都可以應付。

摷定啲花膠，桂圓，紅棗，杞子，雪耳，南北杏，南棗，蜜棗．．．有排玩，一人份量又唔洗睇火，最啱我呢類懶人，今個冬天好滋潤wahaha。

仲要試整通心粉，豆腐花，燜燒賣，諗吓都已經好興奮。