首爾 Sea La La汗蒸幕 / 芳香草園 / 悠閒購物4天遊 - Day 1

2010年6月12日

由香港出發往首爾00:40; 由首爾回到香港22:45 零晨機去,晚機返真正玩足4天。食足咁多餐, 而且餐餐食得飽。行程安排ok, 跟團少不免梗有一啲無聊的行程同埋要去指定店舖買野, 不過今次既安排可以接受。

第一站 - 烏冬做早餐
第二站 - 海鷗船 - 此地的海鷗超喜歡食卡樂B
第三站 - Sea La La汗蒸幕, 晨早5:00落機, 食完早餐搭完海鷗船, 先至8點幾, shopping又冇咁早, 最好就係俾我地瞓番陣, 唔係仲有成日咁長好難捱。
浸完溫泉, 花費了17,000韓圜俾阿豬媽幫我搓背後, 皮膚滑溜到不行, 成個人輕盈咗 。去汗蒸幕當然要食溫泉蛋。呢間汗蒸幕夠大, 地方乾淨, 最重要係我地一早到, 因為今日係星期六到11點幾開始多人, 幸好我們趁多人前攪掂走人。第4站 - 午餐是高麗人蔘雞, 評語: 冇乜味 第5站 - 東大門
去到東大門開始落雨, 氣溫降到20度, 聽導遊介紹先去Hello APM掃貨。

第6站 - 返酒店check-in
房間ok, 比co-op residence闊落許多, 合格, 唯一不好的是燈光太暗, 同行的D小姐一直抱怨。

第7站 - 搵地方食晚餐
星期六的寫字樓區冷冷清清, 很多食店沒有營業, 找到一家食炸醬面的小店, 炸醬面盛惠4,500韓圜, 炸餃子4,000韓圜, 咁既價錢, 冇乜可以要求, 但求醫肚。
第8站 - 便利店

買了香蕉奶,薯片準備今晚在酒店睇世界杯南韓對希臘。
香蕉奶 - 係我今次來首爾的目標之一, 因為之前睇咗"檢察官公主", 對裡面既事物記憶尤新, 香蕉奶是劇中男一女一第一次見面的重要道具, 今次來梗係要買番一支來懷念一下。

第9站 - 漢江海濱公園

汝涘島酒店位於商業區, 今日星期六市面冷清, 酒店離漢江很近, 近酒店的一段漢江海濱公園, 今晚搭建大型屏幕播世界杯南韓對希臘, 韓國人對今晚既比賽, 是100%的重視同緊張, 幾乎全部人都穿上紅色T-shirt, 站在屏幕前為南韓隊打氣, 氣氛勁熱鬧。因為下雨, 沒有一直逗留在公園, 但係回到酒店房間仍可聽到公園內人群既歡呼聲, 尤其南韓入了第一球時歡呼聲振天, 又放煙花, 能感受韓國人對自己國家隊的支持氣氛, 是今日額外的得著。