番茄肉醬千層麵

2009年6月30日肉醬:
豬絞肉、牛絞肉.....各300g
罐頭番茄.....1罐
洋蔥.....1個切小粒
意大利雜香草.....隨意
蒜蓉.....2湯匙
Lasagna.....數片
Mozarella cheese.....適量
Parseam cheese.....適量

調味用料：
蕃茄膏.....2大匙
雞湯.....適量
胡椒鹽.....適量
糖.....適量

※以上用量是我自由發揮, 一邊試味一邊調整到自己啱食為止

肉醬做法：
1.先將蒜蓉爆香, 後加入洋蔥丁翻炒;
2.再放入豬&牛絞肉;
3.等肉類炒到變色再放入罐頭蕃茄、蕃茄膏、雞湯、雜香草, 我仲加左幾大匙上次自制的蕃茄醬;
4.煮滾後轉小火續煮15~20 分鐘;
5.起鍋前，加入黑胡椒鹽、糖調味。

Lasagna
1. 沸水加小撮鹽; 放入Lasagna, 按包裝上的時間煮熟後取出, 切成適當長度;
2. 在器皿底掃一層橄欖油;
3. 先放一塊Lasagna,上放一層肉醬,上再放Mozarella cheese;
4. 重覆3至舖滿器皿, 係最上一層Mozarella cheese上再加Parseam cheese;
5. 放入焗爐以160度焗至cheese變金黃色即可。

圖中我係用一個小碗做, 做好整個反轉倒出來, 因為肉醬千層麵的卡路里實在太高, 雖然好味, 但要控制食既份量。

肉醬可以做多啲, 放入冰箱, 食時放入微波爐叮熱便可。

咖哩雞飯

2009年6月26日 上次既咖哩雞扒飯係用日清美味寶, 今次改用日式咖哩磚, 用新鮮的薯仔同甘筍, 味道好很多哦。

愛醬

2009年6月24日

我煮食既idea係先有食譜, 後有醬料, 最後看醬料是否齊全才動手煮。一般我們每晚來來去去都係食雞鴨豬牛羊魚, 但係點解全世界每個地方以同一種肉類卻可變出不同的菜式, 我既想法係因為是用了不同的調味醬料和烹調方法 。因此cc'super, mk'place,吉吉島,梳歌等就成為我既尋寶地, 每次去都會搜購不同的醬料, 單係日本菜用既醬料就令我目不暇給。對我來說又是一個開心的學習過程。

韓式炒米粉

2009年6月23日

先上圖後補文字

蒜香雞翼定食

2009年6月22日

呢個定食setting係依家最常整既晚餐, 基本上配菜同主食不變, 只是主菜改變。今晚係至簡單的焗蒜蓉雞翼, 蒜蓉雞翼是買超市已醃好的, 係我的懶人餐。

煎蜜餞萍果鴨胸+綠茶冷麵

2009年6月16日 蜜餞萍果鴨胸 - 呢個餸都幾易整。
(1) 雪藏鴨胸解凍, 放入grill pan用慢火煎約10分鐘, 倒起漏出來的油, 再放入焗爐爐20分鐘(我喜歡食熟啲), 焗好後放在爐內待10分鐘後取出切片上碟。
(2) 蘋果批皮切件, 平底pan用鴨油加蜜糖慢火煎至略為軟身。最後用小小塩吊味。

Hamburger

2009年6月14日 自家制漢堡包早餐, 我承認我是有點無聊, 忽發奇想要自已整漢堡包, 單是買齊材料同整中間塊肉饀已經花了不少功夫同時間,下次都係叫自己唔好咁衝動, 落樓下麥噹噹買好喇。

煎羊扒

2009年6月13日

雖然用焗爐grill羊扒比較省事, 但就很難控制火路跟生熟度, 要食好味的始終要花多些心機跟時間, 用Le Creuset慢火煎包保萬無一失, 好味就在眼前。

自家制 Italian Tomato Sauce with basil

2009年6月13日煮意大利粉一定要有意粉醬, 番茄紅醬絕不可少, 今回我按食譜自制了一瓶 Italian Tomato Sauce with basil, 不含防腐劑, 食得健康又有成功感。

不一樣的生活

2009年6月12日

唔經唔覺已經在香港獨居了2個月, 一個人的生活可以有多大的改變? 1年前既自己完全唔會想像得到今日自己既生活係咁樣:

(1) 必定準時9時返工, 多數係7時前離開公司, 儘可能不OT。

(2) 每日既lunch係食自己整既午餐。食既時候再一路諗今晚想食乜餸。

(3) 上網search食譜, 放工後去逛超市買餸。

(4) 返到家裡, 第一時間睇下株蝴蝶蘭有冇開花, 再check下2株香草有冇出狀況。

(5) 家裡冇安裝寬頻上網, 唔會係屋企check電郵, 同做任何有關工作既野。

(6) 每晚忙著張羅煮晚餐及翌日的午餐, 想不停的轉換口味, 試做不同國家既菜式。

(7) 晚餐後的時間就用來: 煲日/韓/台劇/電影 or 練琴 or 睇書 or 打理下我個wardrobe 同啲植物。

(8) 午夜12點前一定上床瞓覺。依家每日既生活就係如此忙碌但簡單的運轉。

雖然如此, 但每天都希望自己比上一天有一點進步, 不論是在廚藝、琴技、又或者園藝。要證明自己用錢買時間的決定係正確, 所以更要好好的善用時間, 令自己生活得更惬意。

p.s. 依家既生活同呢個blog既名, 真係有點格格不入。

士多啤梨骨+Tandoori Naan

2009年6月12日

先上圖後補文字

迷迭香烤羊扒

2009年6月11日 放工後整晚餐最省事的當然係整扒, 當中最簡單的方法就係放入焗爐grill, 今晚就來一個迷迭香烤羊扒。

辣白菜炒烏冬

2009年6月10日

在超市買了包辣白菜, 用來炒烏冬, 雖然簡單但對喜吃辣的我來說, 真是百吃不厭, 越食越想食多啲。令人很滿足的一頓晚餐。

青醬鯰魚螺絲粉

2009年6月9日

意大利粉一般都是分紅醬同白汁, 但尚有一種我們比較少在坊間見到的就是青醬, 青醬是用羅勒葉加上松子,芝士,橄欖油和調味, 用攪拌機將所有材料攪混的醬料, 主要是用在海鮮類的意大利粉上, 一直好想試下呢款醬汁, 有了新買回來的羅勒, 再問媽媽要了台攪拌機, 急不及待的想要試做這個青醬, 因為羅勒葉太少, 只能做出夠一次用的青醬。烹調的方法很簡單, 先將鯰魚切粒再加上玉米粒跟已預先煮熟的螺絲粉炒埋一碟, 熄火後再加上青醬拌勻便成。試食結果是超好味, basil 不愧是香料之王, 它的香味跟海鮮很搭。依家希望株basil快高長大, 可以有更多的葉來給我做醬。

金菇肥牛卷+綠茶冷麵

2009年6月7日

今日打完羽毛球後，去了搜購日式餐具，有咗合適既餐具，終於可以整我想整咗好耐既“金菇肥牛卷+綠茶冷麵”。

唔好以為個餐盤上有好多食物，就以為要花很多時間去準備，其實整個餐用不了半個小時就整好。辣白菜同酸瓜都係即食材料，加上在超市買即沖麵豉湯。前菜加湯不用3分鐘就攪定。

金菇肥牛卷係前一天得閒既時候已經醃好同捲好，今晚只係下鑊煎熟，再煮埋個冷麵，ok。

可以改進既地方：(1) 肥牛捲得太實, 下次可以鬆啲手; 又或者放多些金菇, 令到肥牛唔需要捲咁厚可以容易啲熟 。(2) 呢款冷麵汁都係偏咸, 下次要試過另一款; (3) 屋企冇蔥同蘿蔔, 所以個冷麵汁好齋, 冇落蔥花同蘿蔔蓉, 唔知係咪因為咁所以覺得個汁偏咸呢? 要再研究!

雲吞撈麵套餐

2009年6月4日

扮池記既雲吞撈麵套餐, 星期日打完波好多時都係去池記醫肚, 呢排都冇乜食過中餐, 今日又攰攰地, 不如整呢個超簡單中式晚餐 。

材料: (1) 鮑魚麵; (2) 菜芯; (3) 東東牌蝦肉雲吞, 我以為東東雲吞麵全線執笠後, 已經銷聲匿跡, 原來轉做冷藏包, 今日就試下, 大家睇到唔好噓, 對一個新近移居回港的我來說, 真係覺得新奇。

要改進的地方: 啲菜烚的太腍, 真係乜野都有學問, 單係時間既掌握就已經好考人。

如果願意想開, 一秒就可以想開

2009年6月3日

副題: 煲完"敗犬女王"後的感想。

似乎3高女生的婚姻問題不單在香港很普遍, 在台灣都引起不少關注, 不然也不會有這劇目的出現, 並引起了話題。

說是偶像劇, 但這故事應該標籤為實況劇較為貼切。是一個以當紅偶像來包裝的實況小品。

為什麼我會這樣說? 撇開所有枝節, 單無雙("女王")的經歷, 或多或少都反映了3高女的經歷。

(1) "女王"有一定的能力及喜歡工作, 不然不會成為3高女。
(2) 一天突然發現身邊所有人都有伴侶, 自己年紀已經有點大, 開始思考找個伴的問題。
(3) 原來找個伴並不像工作, 不是只要自己肯衝肯拼就會成功, 女王開始徨恐。
(4) 機會來臨, 面對決擇的迷茫。
(5) 王子跟公主以後一起快樂生活的老梗在N百年前已死亡, 所以縱使女王揀對了也並不代表有完滿的結果, 反而是實際問題的開始。
(6) 最後多番折騰掙扎過後, 原來結不結婚已經不是一個重點, 而是女王終於找到一條她自己要走的路。

追這劇去到中段開始有點悶, 看在阮經天的份上繼續看下去, 但估不到到最後十多分鐘令我有很大的驚喜, 正如Kate所說, 女主角的選擇其實不應只是2擇1, 選男1或男2, 她可以有第三個選擇。我想問題的重點是她對自己有多大的信心, 到最後是否知道自己究竟要什麼, 不再受制於社會、家庭、公司、或朋輩的觀念和壓力, 而是真心過自己想要的生活。

最喜歡的一句對白: "如果願意想開, 一秒就可以想開, 不是嗎?"。